Administrata Amerikane e Ushqimit dhe Barnave (FDA), ka ngritur shqetësimin për përdorimin e probiotikëve tek foshnjat e parakohshme. Kjo erdhi pas vdekjes së një foshnje në mjediset spitalore pas përdorimit të tyre.
Produktet probiotike po shiten ilegalisht për të trajtuar ose parandaluar sëmundjet tek foshnjat e parakohshme në mjediset spitalore dhe për të zvogëluar rrezikun e enterokolitit nekrotizues, sipas FDA-së, shkruan Health News përcjell Gazeta Shneta.
Foshnjat e parakohshme të cilëve u jepet një produkt probiotik janë në rrezik të sëmundjes invazive, potencialisht fatale ose infeksionit, të shkaktuar nga bakteret ose majat që ndodhen në probiotikë.
FDA
Enterokoliti nekrotizues është një sëmundje kërcënuese për jetën në të cilën indet në zorrë inflamohen dhe fillojnë të vdesin. Gjendja prek pothuajse ekskluzivisht foshnjat më pak se katër javë, me një shkallë vdekshmërie deri në 50%.
Në shtator, FDA u dërgoi një letër ofruesve të kujdesit shëndetësor duke përshkruar një rast të një foshnjeje të parakohshme që vdiq nga sepsa e shkaktuar nga Bifidobacterium longum pasi iu administrua një probiotik, prodhuar nga ‘Infinant Health’.
Përdorimi i probiotikëve tek foshnjat është shoqëruar me më shumë se dy duzina ngjarje të tjera negative të raportuara në Shtetet e Bashkuara që nga viti 2018, raporton FDA.
“Ngjarjet e padëshiruara në çdo foshnjë pas përdorimit të një probiotiku janë një shqetësim për FDA. Ne duam veçanërisht të bëjmë të qartë se produktet që përmbajnë mikroorganizma të gjallë mund të paraqesin rreziqe serioze për foshnjat e parakohshme në mjediset spitalore,” tha Dr. Peter Marks, drejtor i Qendrës për Vlerësimin dhe Kërkime Biologjik të FDA-së, në një deklaratë.
Probiotikët janë produkte që përmbajnë organizma të gjallë si baktere ose maja dhe zakonisht tregtohen si ushqime ose shtesa dietike. Nuk ka probiotikë të aprovuar nga FDA për t’u përdorur tek foshnjat e çdo moshe.
Për më tepër, probiotikët e pamiratuar dhe të palicencuar nuk i janë nënshtruar vlerësimit të agjencisë para tregut për sigurinë dhe efektivitetin.
FDA lëshoi letra paralajmëruese për kompanitë që shesin produkte të ngjashme probiotike të destinuara për foshnjat, ‘Abbott Laboratories’ dhe ‘Infinant Health’ (Të dyja kompanitë i tërhoqën vullnetarisht këto produkte, raportoi Reuters). /Gazeta Shneta/