Prof.dr. Izedin Osmani pasi kreu Fakultetin e Mjekësisë në Beograd në vitin 1952, Osmani një viti më vonë u inkuadrua në Spitalin e Përgjithshëm të Prishtinës, ku pas specializimit vazhdoi punën në Repartin e Pediatrisë.
Më vonë bëhet drejtori i parë shqiptar i këtij spitali, më 1967. Është meritë e tij që aty brenda një kohe u inkuadruan më shumë mjekë shqiptarë. Po ashtu në saje të përpjekjeve të tij shumë mjekë shqiptarë specializuan, për të dhënë pastaj kontributin e tyre nëpër qytetet e tjera të Kosovës. Fryti më i madh i punës së tij ishte angazhimi së bashku me disa mjekë të tjerë shqiptarë në hapjen e Fakultetit të Mjekësisë në vitin shkollor 1969/70.
Në vitin 1976 mbrojti tezën e doktoraturës, për të fituar pastaj titullin e profesorit ordinar në lëndën e pediatrisë. Gjatë punës së tij ai botoi dhe publikoi doracakë profesionalë dhe punime të shumta shkencore dhe profesionale në vend (ish Jugosllavi) dhe jashtë vendit.
Ishte edhe mentor i shumë doktorantëve të shkencave mjekësore, koautor dhe recensent i shumë librave profesionalë. Me vendosjen e masave të dhunshme të regjimit serb, më 1990, u largua nga puna, por më 1992 vazhdoi punën e profesorit në Fakultetin e Mjekësisë në sistemin paralel të arsimit shqip.
Pas përfundimit të luftës, në vitin 1999, vazhdoi punën si mjek dhe si mësimdhënës në Klinikën e Pediatrisë deri në pensionim. Gjatë punës së tij shumëvjeçare u dekorua me mirënjohje dhe dekorata të shumta për punën e tij të palodhshme dhe për kontributin e dhënë në avancimin e shëndetësisë kosovare.
Izedin Osmani ka vdekur në prill të vitit 2011.
