Ndërkohë që, Evropa është duke luftuar me rritjen e rasteve pozitive si rezultat i përhapjes së variantit Delta, disa prej vendeve tashmë kanë bërë vaksinimin e obliguar për punonjësit shëndetësorë.
Franca dhe Greqia janë dy nga vendet që e përkrahën vendimin e Italisë shkruan CNN, transmeton Gazeta Shneta.
Në këto shtete, vaksinimi për punonjësit shëndetësorë do të jetë obligativ.
Në anën tjetër, edhe qeveria e Britanisë së Madhe pritet të ndërmarrë masa të tilla për personelin shëndetësorë që nga muaji tetor i këtij viti.
Mirëpo, jo të gjithë punonjësit shëndetësorë janë të kënaqur me këtë vendim.Në Itali, si rezultat i këtij vendimi janë ngritur edhe padi ndërsa, në Britani është ngritur një peticion kundër vendimit të planifikuar nga qeveria.
Presidenti francez, Emmanuel Macron ka njoftuar se punonjësit shëndetësorë, në të gjitha kategoritë, duhet të vaksinohen deri më 15 shtator.
Pas këtij njoftimi, Ministri i Shëndetësisë në Francë, Olivier Véran, shtoi se punonjësit e pavaksinuar do t’u mohohet e drejta për vazhdim të punës.
Ndërkohë, vendimin e njejtë ka ndërmarrë edhe kryeministri grek, Kyriakos Mitsotakis, i cili ka njoftuar se punonjësit të cilët refuzojnë vaksinën do të pezullohen nga puna duke filluar nga data 16 gusht të këtij viti.
Sipas tij, vaksinat do të jenë të detyrueshme për të gjithë punonjësit shëndetësorë, si në sektorin publik ashtu edhe në atë privat./GazetaShneta/