Asambleja Kombëtare Franceze votoi për t’u lejuar disa njerëzve në fazat e fundit të një sëmundjeje terminale të drejtën për t’i dhënë fund jetës së tyre me ndihmën e personelit mjekësor.
Projektligji, i cili mbështetet edhe nga Presidenti Emmanuel Macron, u miratua me 305 vota pro dhe 199 kundër. Më pas do të shkojë në Senat, përpara një leximi të dytë në Asamblenë Kombëtare. Mbështetësit e tij shpresojnë se do të bëhet ligj deri në vitin 2027.
Nëse bëhet ligj, Franca do të bëhet vendi i tetë në Bashkimin Evropian që lejon vetëvrasjen e asistuar.
Versioni francez është më i rreptë se ai i Holandës ose Belgjikës, vendet e para në Evropë që legalizuan vdekjen e asistuar.
Pas shumë debatesh mbi dispozitat e ligjit, ligjvënësit francezë arritën në përfundimin se ai do të zbatohej për njerëzit “që vuajnë nga një sëmundje serioze dhe e pashërueshme” që është “kërcënuese për jetën dhe në një fazë të avancuar ose terminale” dhe që “vazhdojnë të vuajnë fizikisht ose psikologjikisht”.
Pacienti do të duhej të ishte në gjendje të “shprehte lirisht qëllimin e tij”. Ai do të duhej të priste 48 orë dhe pastaj ta konfirmonte atë.
Sapo të miratohej, doza vdekjeprurëse do të administrohej nga vetë pacienti ose nga një asistent mjekësor nëse pacienti nuk është në gjendje ta bëjë vetë. Miratimi do të jepej nga një mjek, por vetëm pas konsultimit me kolegët.
Personeli mjekësor që kundërshton vetëvrasjen e asistuar nuk do të jetë i detyruar ta kryejë atë. Megjithatë, ata do të dënohen me burgim deri në dy vjet nëse e pengojnë.