Agjencia Shëndetësore e OKB-së, në bashkëpunim me partnerët e saj, do të nisin një fushatë të madhe për të vaksinuar 640,000 palestinezë në Gaza kundër poliomielitit. Kjo fushatë do të fillojë të dielën, dhe përpjekjet për vaksinimin do të zhvillohen gjatë një “pauze humanitare” që do të zgjasë nga ora 6 e mëngjesit deri në orën 15:00.
Kjo nismë vjen në një periudhë të vështirë për Gazën, e cila po përballet me një luftë shkatërruese që ka dëmtuar rëndë sistemin e kujdesit shëndetësor. Fushata është e nevojshme pas shfaqjes së rastit të parë të poliomielitit në 25 vjet në këtë territor. Një djalë 10 muajsh është paralizuar si rezultat i kësaj sëmundjeje, shkruan BBC, transmeton Gazeta Shneta.
Organizata Botërore e Shëndetësisë ka njoftuar se pranisë së këtij rasti të paralizës mund të tregojë se ka qindra të tjerë që janë infektuar, por nuk kanë shfaqur simptoma. Poliomyeliti, një sëmundje që nuk ka shërim kur shkakton paralizë, mund të jetë gjithashtu fatal nëse prek muskujt e frymëmarrjes.
Për të mundësuar zhvillimin e kësaj fushate, OBSh-ja ka arritur një marrëveshje me Izraelin për të ofruar pauza të kufizuara në luftime. Megjithatë, sfidat janë të mëdha në një territor të mbuluar me rrënoja dhe me 90% të popullsisë që janë të zhvendosur.
Fushata do të fillojë në Gazën qendrore dhe më pas do të shtrihet në Gazën jugore dhe veriore gjatë pauzave të ngjashme. Ministria e Shëndetësisë me bazë në Ramallah ka njoftuar se do të ketë mbi 400 vende vaksinimi “fikse”, përfshirë në Khan Younis, ku densiteti i popullsisë është më i lartë dhe ka 239,300 fëmijë nën 10 vjeç.
Ky është një hap i rëndësishëm në përpjekjen për të ndalur përhapjen e poliomielitit dhe për të mbrojtur shëndetin e fëmijëve në Gaza./Gazeta Shneta/