Salla e operacionit në Klinikën e Ortopedisë është mbyllur për shkak të gjendjes skandaloze në të cilën është aktualisht.
Gazeta Shneta ka siguruar fotografi nga brenda hapësirave të sallës së operacionit në këtë klinikë ku shihet gjendja e rëndë e mureve të kalbura nga lagështia. Për këtë gjendje QKUK ishte alarmuar edhe më herët nga mjekët e klinikës por nuk është ndërmarr asgjë.
Gazeta ka mësuar se salla është mbyllur nga Inspektorati Sanitar. Drejtori i Klinikës Dr. Arber Tolaj nuk i është përgjigjur thirrjeve të Gazetës në telefon, ndërsa QKUK ende nuk ka kthyer përgjigje në pyetjet e dërguara në adresën elektronike.
Për shkak të kësaj gjendje është anuluar edhe programi operativ ku si pasojë do të ketë pritjen e dhjetëra pacientëve deri në rikthimin e sallës. Llogaritet që rreth 10 operacione në ditë kryhen nga ortopedët.
Ndërkaq QKUK gjatë ditës së djeshme ka hapur një thirrje për kontratë për renovimin e sallës me vlerë afër 10 mijë euro. Në dosjen e tenderit kërkohet që punët të kryhen brenda 15 ditëve.
“Duhet pasur parasysh qe vendi i kryerjes se punimeve jane sallat e operacionit dhe natyra e punes eshte e ndjeshme. Kompania duhet te jete serioze, te kryje punen ne menyre profesionale, shpejte dhe me kualitet te larte per shkak te krijimit te kushteve sanitare te pershtatshme per operacione. Kerkohet qe OE te deklarohet se per shkak te emergjencave punimet do te kryhen brenda 15 diteve kalendarike”, thuhet në dosjen e tenderit. /Gazeta Shneta/
