Një studim i ri ka zbuluar lidhje të forta midis zakoneve të dobëta të gjumit dhe 172 sëmundjeve të ndryshme, përfshirë demencën, diabetin tip 2 dhe sëmundjen e Parkinsonit. Sipas këtij hulumtimi, 92 prej këtyre sëmundjeve kishin më shumë se 20% të rrezikut të tyre të lidhur me gjumin e çrregullt.
Studiuesit analizuan të dhënat mjekësore të mbi 88,000 të rriturve nga databaza e UK Biobank, duke vëzhguar cilësinë e gjumit dhe diagnozat e sëmundjeve gjatë një periudhe mesatare prej 7 vjetësh.
Rezultatet treguan se modelet e parregullta të gjumit – si fjetja në orare të ndryshme dhe çrregullimi i ritmit cirkadian – rrisin rrezikun për dhjetëra sëmundje, shkruan Medical News Today transmeton Gazeta Shneta.
Në 42 raste, rreziku për sëmundje si mosfunksionimi fizik në pleqëri, gangrena, fibroza dhe cirroza e mëlçisë ishte të paktën i dyfishuar.
Gjumi i dobët rezultoi gjithashtu i lidhur me raste të shtuara të hipertensionit, dështimit akut të veshkave dhe çrregullimeve neurologjike.
Sipas autorit kryesor, prof. Qing Chen, nuk është e mjaftueshme vetëm të flitet për kohëzgjatjen e gjumit – rregullsia e ritmit të gjumit është po aq e rëndësishme për shëndetin afatgjatë.
Hulumtuesit tani synojnë të kuptojnë pse çrregullimet e gjumit shkaktojnë sëmundje dhe si mund të parandalohen ato. /Gazeta Shneta/