Një studim i ri në SHBA ka zbuluar mbi 600 lidhje mes endometriozës dhe problemeve të tjera shëndetësore, duke përforcuar idenë se kjo sëmundje nuk prek vetëm sistemin riprodhues, por tërë trupin.
Endometrioza është një sëmundje e dhimbshme që prek rreth një në dhjetë gra në mbarë botën. Megjithëse e përhapur, ajo shpesh diagnostikohet me vonesë dhe opsionet e trajtimit janë të kufizuara, shkruan burimi Euronews Health transmeton Gazeta Shneta.
Studiuesit nga Universiteti i Kalifornisë në San Francisko (UCSF) analizuan mbi 43,000 dosje mjekësore nga gjashtë qendra shëndetësore, duke përdorur algoritme të zhvilluara posaçërisht për këtë projekt.
Ata identifikuan lidhje mes endometriozës dhe sëmundjeve të tjera si migrena, astma, sëmundjet autoimune, sëmundjet e syve dhe disa lloje të kancerit.
“Disa lidhje ishin të pritshme, si infertiliteti apo sëmundjet autoimune, por pati edhe befasime, si kanceret apo sëmundjet e syve,” tha Umair Khan, një nga autorët e studimit.
Dr. Linda Giudice theksoi rëndësinë e të dhënave: “Këto janë të dhënat që na duhen për të përparuar. Diagnostikimi dhe trajtimi i endometriozës nuk ka ndryshuar për dekada.”
Sipas saj, ndikimi në jetën e pacienteve është i madh: nga marrëdhëniet personale, deri te aftësia për të mbajtur një punë, për të krijuar familje dhe për të ruajtur shëndetin mendor.
Trajtimet aktuale përfshijnë terapi hormonale ose kirurgji, por asnjëra nuk garanton lehtësim të plotë dhe shpesh shoqërohen me efekte anësore.
Studiuesit shpresojnë se këto gjetje do të ndihmojnë në diagnostikimin më të shpejtë dhe trajtimin më të saktë të kësaj sëmundjeje ende të pazbuluar plotësisht. /Gazeta Shneta/