Një studim i realizuar nga shkencëtarë në Mbretërinë e Bashkuar ka analizuar nivelet e lipideve tek meshkuj dhe femra me dhe pa sëmundjen e Alzheimer-it ose me dëmtim të lehtë kognitiv.
Sipas burimit Medical News Today, rezultatet treguan se gratë me Alzheimer kishin më pak yndyrna të shëndetshme dhe më shumë yndyrna të pashëndetshme, ndërsa tek burrat nuk u vërejtën ndryshime të rëndësishme.
Ky zbulim sugjeron se rritja e marrjes së omega-3 mund të ketë efekte mbrojtëse tek gratë. Omega-3 gjendet në suplemente, por edhe në ushqime si salmoni dhe farat e linit.
Alzheimer-i është një sëmundje progresive e trurit që ndikon në kujtesë dhe aftësitë njohëse, duke çuar shpesh në komplikime serioze.
Vetëm në SHBA, mbi 7 milionë njerëz jetojnë me këtë sëmundje, dhe pritet që numri të dyfishohet deri në vitin 2050.
Statistikat tregojnë se gratë diagnostikohen më shpesh sesa burrat, duke nxitur kërkime mbi faktorët biologjikë që qëndrojnë pas kësaj mospërputhjeje.
Lipidet kanë rol thelbësor në përbërjen e membranave qelizore dhe funksionimin e trurit, veçanërisht në mbështetjen e sinjaleve nervore.
Ndërsa yndyrnat e pangopura janë të dobishme, yndyrnat e ngopura dhe trans rrisin kolesterolin LDL, të njohur si “kolesteroli i keq”.
Ky studim u botua në “Alzheimer’s & Dementia: The Journal of the Alzheimer’s Association”. /Gazeta Shneta/