I plotësuar: Gruaja e vrarë sot para hyrjes së Klinikës së Gjinekologjisë në QKUK, ishte në javën e fundit të shtatzënisë, ndërroi jetë edhe foshnja.
Gruaja 35-vjeçare e cila u qëllua për vdekje sot para hyrjes së Gjinekologjisë në QKUK, ishte në javën e fundit të shtatzënisë. Nga të shtënat ka mbetur e vdekur edhe foshnja, shkruan Gazeta Shneta.
Gazeta ka mësuar se e ndjera ishte shtrirë në Gjinekologji për terminin e lindjes, por para disa minutash ishte takuar me ish-bashkëshortin e saj në oborrin e klinikës.
Ish-bashkëshorti dyshohet të ketë shtënë disa herë në drejtim të saj, duke e lënë të vdekur nënën bashkë me foshnjën.
Rasti është konfirmuar edhe nga Policia e Kosovës, të cilët kanë thënë se po hetohet nga njësitet në koordinim me prokurorin e shtetit.
“Rreth orës 18:00, kemi pranuar informatën për një trup të pajetë, në oborrin e QKUK-së në Prishtinë. Policia menjëherë ka dalë në vendin e ngjarjes si dhe ekipi mjekësor të cilët kanë konstatuar vdekjen e viktimës, femër, rreth 35 vjeç. Mbështetur në informacionet e para, dyshimet e ngritura sugjerojnë se bëhet fjalë për vrasje. Aktualisht policia në koordinim me prokurorin e shtetit ka nisur një hetim dhe po vijon ndërmarrjen e të gjitha veprimeve hetimore dhe të ekzaminimit, me qëllim sqarimin e plotë të ngjarjes”, ka thënë zëdhënësja e Policisë Flora Ahmeti. /Gazeta Shneta/
—————————————————————————————————————————-
Një krim i rëndë dyshohet të ketë ndodhur para pak minutash para hyrjes së Klinikës së Gjinekologjisë në QKUK.
Një burrë dyshohet se e ka qëlluar me armë bashkëshorten e tij shtatzënë.
Në vendin e ngjarjes janë parë njësitet e Policisë së Kosovës.
Më poshtë mund t’i shihni disa fotografi nga vendi i ngjarjes. /Gazeta Shneta/
