Oda e Mjekëve të Kosovës (OMK) ka hapur zyrtarisht regjistrimin për pjesëmarrje në Kongresin e VIII të Mjekësisë, i cili do të mbahet nga 22 deri më 24 tetor në Hotel Emerald në Prishtinë.
Sipas njoftimit të OMK-së, kongresi i sivjetmë do të organizohet me temën “Promovimi dhe Edukimi Shëndetësor – Në 40-vjetorin e Kartës së Otavës: Së bashku për shëndet dhe mirëqenie”, duke u fokusuar në zhvillimet më të reja, sfidat dhe praktikat bashkëkohore në fushën e promovimit dhe edukimit shëndetësor.
OMK ka ftuar të gjithë mjekët e interesuar që të regjistrohen përmes platformës digjitale të Odës, duke theksuar se pjesëmarrja në kongres do të realizohet vetëm me prani fizike.
Sipas njoftimit, numri i pjesëmarrësve është i kufizuar, ndërsa regjistrimi do të mbetet i hapur deri në plotësimin e kapaciteteve të parashikuara.
Për t’u regjistruar, mjekët duhet fillimisht të hyjnë në profilin e tyre në platformën digjitale të OMK-së dhe më pas të aplikojnë për pjesëmarrje përmes seksionit të dedikuar për edukimin e vazhdueshëm profesional.
Pas përfundimit të aplikimit, konfirmimi i regjistrimit do të dërgohet në adresën elektronike të përdorur gjatë procesit.
Oda e Mjekëve të Kosovës ka bërë të ditur se të gjitha informacionet dhe njoftimet lidhur me Kongresin e VIII të Mjekësisë do të publikohen në kanalet e saj zyrtare.
Në rast të vështirësive teknike gjatë regjistrimit online, OMK ka vënë në dispozicion edhe mbështetje përmes numrit të telefonit 049 872 300 dhe adresës elektronike [email protected].