Aktivistja Agnesa Kastrati ka ndarë përvojën e saj pas lindjes së fëmijës së dytë në Qendrën Klinike Universitare të Kosovës (QKUK), duke vlerësuar përmirësimet në kujdesin shëndetësor dhe kushtet në Klinikën e Gjinekologjisë dhe Neonatologjisë.
Kastrati përmes një postimi në rrjetin social Facebook, thotë se të dyja lindjet i ka kryer në të njëjtën klinikë, me një diferencë prej më shumë se katër vitesh, gjë që i ka mundësuar të krahasojë ndryshimet. Sipas saj, këtë herë kujdesi nuk ishte i përqendruar vetëm te foshnja, por edhe te lehona, me vizita dhe kontrolle të rregullta nga gjinekologu dhe neonatologu.
Ajo thekson se foshnja e saj, përveç kontrolleve rutinë, iu nënshtrua edhe skriningut neonatal, një shërbim që nuk ofrohej në kohën kur lindi fëmijën e saj të parë.
Në reagimin e saj, Kastrati vlerëson edhe përmirësimin e kushteve në repartin e lehonave. Ajo kujton se më parë banjot ndodheshin në fund të korridorit, ndërsa tani dhomat me dy shtretër dhe banjo brenda tyre e bëjnë qëndrimin më të lehtë dhe më dinjitoz për nënat.