Një studim i ri tregon se humbja e dëgjimit mund të jetë përgjegjëse për deri në një të tretën e rasteve të demencës tek të moshuarit.
Hulumtimi, i publikuar në “JAMA Otolaryngology–Head & Neck Surgery”, përfshiu gati 3,000 persona të moshës 66 deri në 90 vjeç dhe zbuloi se 66% e tyre kishin humbje dëgjimi, ndërsa 8% zhvilluan demencë gjatë periudhës mesatare 6.5-vjeçare të ndjekjes, shkruan burimi Health News transmeton Gazeta Shneta.
Përmes një metode epidemiologjike, studiuesit arritën në përfundimin se 32% e rasteve të demencës mund t’i atribuohen humbjes së dëgjimit. Megjithatë, përdorimi i aparateve të dëgjimit tregoi vetëm një lidhje modeste me rrezik më të ulët për demencë.
Ekspertët theksojnë se, edhe pse nuk ka prova përfundimtare se aparatet e dëgjimit parandalojnë demencën, ato janë të dobishme për cilësinë e jetës dhe shëndetin e përgjithshëm. Humbja e dëgjimit mund të çojë në ngarkesë kognitive më të madhe, izolim social dhe depresion – të gjitha këto faktorë të njohur rreziku për zhvillimin e demencës.
Gjithashtu, mund të ketë lidhje biologjike mes dëgjimit dhe trurit: humbja e dëgjimit mund të ulë aktivizimin nervor, të ndikojë në strukturën e trurit dhe të përshpejtojë proceset degjenerative. Prandaj, trajtimi i humbjes së dëgjimit mund të luajë një rol kyç në ruajtjen e funksionit kognitiv tek të moshuarit. /Gazeta Shneta/