Një test i ri gjaku që mat nivelet e një proteine të quajtur neurofilament i lehtë (sNfL) mund të ndihmojë në parashikimin e rikthimit të simptomave tek pacientët me sklerozë multiple (MS), sipas një studimi të paraqitur në Kongresin e Akademisë Evropiane të Neurologjisë në Helsinki.
Studiuesit zbuluan se nivelet e sNfL në gjak rriten ndjeshëm deri në një vit para një rikthimi, tek pacientët që nuk kishin simptoma në atë moment, shkruan burimi Health Day transmeton Gazeta Shneta.
“Këto të dhëna mbështesin fuqishëm idenë që sNfL ka potencial real për t’u përdorur në monitorimin rutinë të MS-së,” tha udhëheqësja e studimit Maria Martinez-Serrat nga Universiteti Mjekësor i Grazit.
MS ndodh kur sistemi imunitar sulmon mielinën, mbështjellësen mbrojtëse të nervave, duke shkaktuar dëmtime të pakthyeshme në lëvizje, shikim, humor dhe kujtesë. Shpesh, pacientët kalojnë në periudha të qetësisë, mes episodeve të përkeqësimit.
Studimi, që analizoi të dhëna nga 162 pacientë përreth 10 vjet, tregoi se nivelet e sNfL mund të shërbejnë si sinjal paralajmërues vetëm gjatë periudhave të qetësisë. “Kur dikush është në një rikthim aktiv, nivelet e sNfL janë tashmë të larta për shkak të dëmtimit të vazhdueshëm nervor,” shpjegoi Martinez-Serrat.
Megjithatë, testimi mund të parashikojë rrezikun vetëm për një periudhë deri në një vit dhe duhet përdorur bashkë me biomarkues të tjerë për të ndërtuar një pamje më të plotë të rrjedhës së sëmundjes. /Gazeta Shneta/