Instituti Kombëtar i Shëndetësisë Publike të Kosovës (IKSHPK) ka njoftuar sot se, në përputhje me ligjet dhe udhëzimet administrative në fuqi, të gjithë fëmijët që regjistrohen në institucione parashkollore dhe shkolla fillore duhet të kenë dëshmi të vaksinimit sipas moshës.
Sipas njoftimit të IKSHPK-së ky vendim synon mbrojtjen e shëndetit të fëmijëve dhe komunitetit shkollor, duke parandaluar përhapjen e sëmundjeve ngjitëse dhe duke garantuar një mjedis më të sigurt edukativ, transmeton Gazeta Shneta.
IKSHPK apelon tek prindërit që të sigurojnë dokumentacionin përkatës gjatë regjistrimit të fëmijëve të tyre.
“Mbrojtja e shëndetit të fëmijëve është përgjegjësi e përbashkët për të gjithë ne” thuhet në njoftimin e IKSHPK-së./Gazeta Shneta/
Njoftimi i plotë:
Në përputhje me Ligjin nr. 08/L-200 për Parandalimin dhe Kontrollin e Sëmundjeve Ngjitëse, Udhëzimin Administrativ nr. 05/2025 për Imunoprofilaksë dhe Kimoprofilaksë, Udhëzimin Administrativ (MASHTI) nr. 09/2023 për Regjistrimin e Fëmijëve në klasën e parë, Udhëzimin Administrativ (MASHTI) nr. 03/2022 për Përfshirjen e Fëmijëve në Institucione Parashkollore në Kosovë, si dhe Qarkoren Informative të Ministrisë së Shëndetësisë nr. 05/2025, njoftojmë se:
Fëmijët që regjistrohen në çerdhe, kopshte dhe shkolla fillore duhet të pajisen me dëshmi të vaksinimit, që tregon se janë vaksinuar sipas moshës në momentin e regjistrimit.
Kjo masë ka për qëllim mbrojtjen e shëndetit të fëmijëve dhe të gjithë komunitetit shkollor, duke parandaluar përhapjen e sëmundjeve ngjitëse dhe duke siguruar një mjedis të sigurt arsimor dhe edukativ për të gjithë.
Prindërit që kanë pyetje apo nevojë për sqarime, mund të kontaktojnë Qendrën e Mjekësisë Familjare më të afërt për ndihmë dhe këshillim të mëtejshëm.
Mbrojtja e shëndetit të fëmijëve është përgjegjësi e përbashkët për të gjithë ne!
