Inspektorati Shëndetësor nuk ia ka ndaluar konsultat me pacientë mjekut turk pa licencë në Prishtinë.
Inspektorati Shëndetësor nuk ia ka ndaluar konsultat me pacientë në Prishtinë, mjekut nga Turqia i cili nuk kishte licencë nga Ministria e Shëndetësisë, shkruan Gazeta Shneta.
Kjo është konfirmuar nga vet MSH në një përgjigje për Gazetën, ku janë arsyetuar se mjeku Mustafa Atabey ka mbajtur vetëm konsulta gojore me pacientë.
“Sipas ekipës inspektuese është konstatuar se aty – në hapësirat e hotelit nuk bëhej asnjë ekzaminim – shërbim shëndetësor, por vetem konsulta gojore -informata me qytetar të cilët ishin të interesuar për ndërhyrje estetike në Turqi. Në hapësirën ku qëndronte mjeku ishin disa karrika rreth një tavoline, si dhe afër mjekut ishte edhe përkthyesja. Nuk posedonin dokumentacion shëndetësor, raporte mjekësore, udhëzim për konsultim, udhëzim për hulumtime diagnoztike, as aparaturë medicinale”, thuhet në përgjigjen e Ministrisë së Shëndetësisë.
Kirurgu Atabey ka ardhur në Prishtinë përmes një kompanie për të rekrutuar pacientë potencial për të kryer operacione në një spital në Stamboll.
Paraprakisht Ministria e Shëndetësisë e kishte konfirmuar për Gazetën Shneta se mjeku nuk kishte marr licencë nga ky institucion.
Në raste të tjera Inspektorati Shëndetësor kur ka konstatuar se mjek të huaj kanë ardhur në Kosovë për të mbajtur konsulta, pa marr licencë nga MSH, ua ka ndaluar konsultat e madje edhe i ka gjobitur.
Një rast i ngjashëm ka ndodhur hiq më larg se në muajin shkurt. Inspektorati kishte kryer inspektim pas denoncimit nga Gazeta Shneta se mjeku turk Metin Karadeniz po mbante konsulta me pacientë në Qendrën estetike “Pi” në Prishtinë.
Inspektorati e gjobiti me 5 mijë euro Qendrën “Pi” dhe 2 mijë euro mjekun turk pa licencë
Pas inspektimit mjeku nga Turqia ishte gjobitur me 2 mijë euro, ndërsa Qendra “Pi” me pesë mijë euro.
Ngjashëm ka ndodhur edhe në një rast tjetër në vitin 2020. Pas denoncimit të Gazetës Shneta, ISH kishte inspektuar zyrën përfaqësuese të Spitalit “Sistina” në Prishtinë ku kishte ardhur një gjinekologe për konsulta me pacientë.
“Perderisa nje institucion nuk aplikon per licencimin e saj te perkohshem dhe nuk merret licenca per ushtrim te veprimtarise shendetesore ne Kosove, (edhe konsultimi mjekesor konsiderohet sherbim), çdo sherbim i ofruar nga ajo do te konsiderohet ne kundershtim me ligjin dhe Inspektorati Shendetesor do te ndermarr masa konform ligjeve ne fuqi si Ligji per Shendetesi, Ligji per Inspektoratin Shendetesor dhe UA per licencimin e profesionisteve te huaj shendetesor ne Kosove”, thuhej në përgjigjen e MSH-së atë kohë. /Gazeta Shneta/
Ekskluzive: “Sistina” shkel ligjet e Kosovës, Inspektorati ia ndalon konsultat për IVF në Prishtinë