Instituti apel qytetarëve që të mbajnë maska dhe të respektojnë rekomandimet

2020-06-17 në ora 09:44

Instituti Kombëtar i Shëndetit Publik ka kërkuar nga qytetarët që të mbajnë maska në vendet e mbyllura ku ka shumë njerëz, si dhe të respektojnë rekomandimet për distancë dhe pastrimin e duarve.

Ky apel i IKSHPK-së vjen pas ditës së djeshme kur u shënuan 141 raste pozitive me Covid-19, dita me më së shumti raste deri më tani në Kosovë, shkruan Gazeta Shneta.

“Këto ditë vërehet fluks i shtuar i lëvizjes së qytetarëve kudo nëpër Kosovë. Kjo është sjellje e rrezikshme dhe lehtësimi i lëvizjes nuk nënkupton mosrespektimin e rekomandimeve të Institutit Kombëtar dhe Ministrisë së Shëndetësisë me mbajten e distancimit fizik dhe mbajtjen e maskave në vendet publike”.

“Pakujdesia e disa qytetarëve gjatë këtyre lëvizjeve dhe aktiviteteve, shton rrezikun e përhapjes së infeksionit përderisa virusi SARS-COV-2 është prezent dhe kështu mund të mbingarkohet sistemi shëndetësor me pasoja të pa parashikuara deri në shpërthim e që mund të paraqes rrezik për jetën e qytetarëve”.

“Si pasojë e mos bartjes së maskave nga ju, qytetarë të nderuar, po rrezikohet shëndeti i juaj dhe i qytetarëve të tjerë dhe po rëndohet situata e përgjithshme epidemiologjike që po mbahet nën kontroll me mund të madh të ekipeve të profesionistëve të Institutit Kombëtar”, thuhet në apelin e IKSHPK-së.

“Apelojmë te qytetarët, bizneset, gastronomia, që në mënyrë strikte të respektojnë distancën fizike, përdorimin e maskave, dezinfektimin dhe ajrosjen e lokaleve, duke pamundësuar përhapjen eventuale të infeksionit dhe shmangien e përhapjes në hapësirat e mbyllura”, thuhet tutje në këtë postim të Institutit. /Gazeta Shneta/