Instituti i Shëndetit Publik në Shqipëri ka njoftuar për 21 raste të reja pozitive me Covid-19, të gjitha raste kontakti në Tiranë.
Sipas ISHP-së, pas një hulumtimi të thellë epidemiologjik ka rezultuar se të gjitha rastet janë kontakt të një infermiere e cila kishte rezultuar pozitive dy ditë më parë, transmeton Gazeta Shneta.
“Nga një hetim i thellë epidemiologjik, rezulton se ndër rastet e reja janë 13 të prekur në QSUT, personel shëndetësor dhe pacientë, kontakte të një infermiere e cila rezultoi pozitive dy ditë më parë, e infektuar jashtë spitalit. Prej tyre 9 janë pa simptoma dhe të vetëizoluar, ndërsa 4 pacientë jane transferuar në spitalin infektiv”, thuhet në njoftimin e ISHP-së.
ISHP ka njoftuar tutje se po vijon hetimi epidemiologjik edhe për disa raste të reja në Tiranë, e cila mbetet vatra kryesore në vend.
Në spitalin infektiv në Tiranë po trajtohen 25 pacientë me Covid-19, ku tre prej tyre janë në terapi intensive. Ne 24 orët e fundit janë të shëruar 9 qytetarë, duke e çuar mbi 800 numrin e të shëruarve që nga fillimi i epidemisë.
Deri tani janë kryer mbi 15 mijë testime molekulare dhe serologjike, ndërsa numri i rasteve të konfirmuara pozitivë në të gjithë vendin është 1050. Prej tyre aktualisht janë 205 persona aktivë me COVID19, kryesisht ne Tiranë, Durrës dhe Krujë. /Gazeta Shneta/