Një studim i ri tregon se inteligjenca artificiale (IA) mund të përshpejtojë ndjeshëm zbulimin dhe përshkrimin e trajtimeve për sëmundjet e zemrës, duke hapur rrugën për kujdes më të personalizuar për pacientët. Sipas studiuesve, kjo teknologji mund të ndihmojë që trajtimet të përshtaten më mirë me mënyrën se si funksionon zemra e çdo individi.
Sëmundjet kardiovaskulare janë shkaku kryesor i vdekjeve dhe paaftësisë në Bashkimin Evropian, duke shkaktuar rreth 1.7 milion vdekje çdo vit dhe duke prekur mbi 62 milion njerëz, sipas OECD-së.
Shkencëtarët në Imperial College London kanë zhvilluar një mjet të ri IA, të quajtur “CardioKG”, i cili kombinon skanime të detajuara të zemrës me baza të mëdha të dhënash mjekësore për të identifikuar lidhjet mes gjeneve, sëmundjeve dhe barnave, shkruan burimi Euronews Health transmeton Gazeta Shneta.
CardioKG u ndërtua duke përdorur të dhëna nga mijëra persona të përfshirë në UK Biobank, përfshirë pacientë me fibrilacion atrial, insuficiencë kardiake dhe infarkte, si dhe vullnetarë të shëndetshëm. Kjo qasje u lejon studiuesve të bëjnë parashikime më të sakta se cilat ilaçe mund të jenë më efektive për gjendje specifike të zemrës.
Ndër barnat e identifikuara ishin metotreksati, i përdorur zakonisht për artritin reumatoid, dhe një grup ilaçesh kundër diabetit të njohura si gliptina.
Modeli sugjeroi se metotreksati mund të ndihmojë pacientët me insuficiencë kardiake, ndërsa gliptinat mund të jenë të dobishme për ata me fibrilacion atrial. U vu re gjithashtu një efekt i mundshëm mbrojtës i kafeinës në disa pacientë, megjithëse studiuesit theksuan se kjo nuk është arsye për të ndryshuar konsumin e saj.
Ekspertët shpresojnë se kjo teknologji do të çojë drejt trajtimeve më të sakta dhe parashikimit më të mirë të zhvillimit të sëmundjeve, jo vetëm për zemrën, por edhe për çrregullime të tjera shëndetësore. /Gazeta Shneta/