Ministri i Shëndetësisë Uran Ismaili, ka vizituar sot Shkupin ku është takuar me homologun e tij Venko Filipche.
Në një postim në Facebook, Ismaili ka bërë të ditur se qëllimi i vizitës ishte diskutimi për avancimin e marrëdhënieve ndërmjet dy vendeve në sektorin e shëndetësisë, shkruan Gazeta Shneta.
“Shkëmbimi i ekspertizave dhe bashkëpunimit në shumë fusha, mes tjerash edhe të Fondeve të Sigurimeve dhe Inspektorateve Shëndetësore, do të jetë prioriteti ynë”, ka shkruar Ismaili.
Ai ka shtuar se Kosova po kalon nëpër reforma të rëndësishme në sektorin shëndetësor dhe në rrugën e saj përpara mirëpret bashkëpunimin me shtetet fqinje.
Ismaili nuk ka bërë të ditur se në çfarë forma do të bashkëpunoj Kosova me Maqedoninë në fushën e sigurimeve shëndetësore.
Por Shkupi është një nga qendrat ku pacientët kosovarë i lënë milionat për çdo vit duke kërkuar shërim.
Përveç që kosovarët shkojnë për t’u shëruar nga sëmundje të ndryshme, poashtu edhe nënat preferojnë të kryejnë lindjen e fëmijëve nëpër spitalet e kryeqytetit maqedonas. /Gazeta Shneta/