Kakao është lidhur me një sërë përfitimesh shëndetësore, duke përfshirë përmirësimin e shëndetit të zemrës, ngadalësimin e plakjes dhe rritjen e funksionit njohës. Megjithatë, ekspertët paralajmërojnë se jo të gjitha produktet e çokollatës ofrojnë të njëjtat përfitime, sidomos ato komerciale.
Përfitimet kryesore të kakaos vijnë nga flavanolet – përbërës natyralë me veti antioksiduese, anti-inflamatore dhe potencialisht mbrojtëse ndaj kancerit.
Gjithashtu, kakao përmban teobrominë, një substancë stimuluese që ndikon në tru duke përmirësuar funksionin njohës dhe duke ofruar mbrojtje ndaj sëmundjeve neurodegjenerative si Alzheimer dhe Parkinson, shkruan burimi Euronews Health transmeton Gazeta Shneta.
Studime të ndryshme kanë treguar se konsumimi i produkteve të pasura me flavanole mund të ulë presionin e gjakut dhe të përmirësojë shëndetin kardiovaskular.
Një analizë e fundit sugjeron se konsumimi i moderuar rreth 1–2 porcione çokollatë të zezë ose disa lugë kakao në ditë mund të sjellë përfitime për zemrën.
Një studim i madh ndërkombëtar zbuloi se personat që konsumonin rregullisht flavanole nga kakao kishin rrezik më të ulët për vdekje nga sëmundjet e zemrës.
Megjithatë, studiuesit theksojnë se këto rezultate nuk do të thonë domosdoshmërisht se konsumimi i çokollatës si ushqim i zakonshëm është i shëndetshëm.
Sa i përket plakjes, disa të dhëna sugjerojnë se nivelet më të larta të teobrominës në gjak lidhen me një moshë biologjike më të ulët. Megjithatë, ekspertët theksojnë se çokollata duhet të konsiderohet më shumë si një kënaqësi sesa një ushqim i domosdoshëm.
Jo të gjitha llojet e çokollatës janë të barabarta. Çokollata e zezë përmban më shumë flavanole dhe më pak sheqer, ndërsa çokollata e bardhë ka më pak vlera ushqyese dhe më shumë yndyrë e sheqer. Për më tepër, përpunimi industrial shpesh ul përmbajtjen e përbërësve të dobishëm. /Gazeta Shneta/