Hulumtimet e fundit tregojnë se mënyra se si konsumohet sheqeri mund të jetë më e rëndësishme sesa sasia e tij. Një analizë e re e ka lidhur konsumimin e pijeve të ëmbëlsuara me një rrezik më të lartë për diabetin tip 2, ndërsa sheqeri i marrë nga ushqimet e ëmbla nuk kishte të njëjtin efekt.
Sheqeri në formë të lëngshme hyn shpejt në qarkullimin e gjakut dhe mund ta ngarkojë mëlçinë, duke shkaktuar rezistencë ndaj insulinës. Ekspertët rekomandojnë heqjen graduale të pijeve të ëmbëlsuara për ta lehtësuar këtë ndryshim, shkruan burimi Health transmeton Gazeta Shneta.
Analiza e mbi 29 studimeve, me më shumë se 500,000 pjesëmarrës, tregoi se çdo gotë prej 355 ml pije të ëmbëlsuar rrit rrezikun për diabet me 25%, ndërsa çdo 240 ml lëng frutash e rrit atë me 5%. Nga ana tjetër, sheqeri i marrë nga ushqimet nuk ishte i lidhur me rritjen e rrezikut; madje, në disa raste dukej se kishte efekt mbrojtës.
Ky dallim lidhet me faktin se pijet e ëmbëlsuara nuk përmbajnë fibra, proteina apo yndyrna që e ngadalësojnë tretjen. Si rezultat, sheqeri kalon shpejt në gjak, duke shkaktuar rritje të menjëhershme të glukozës dhe insulinës, pa sinjalizuar trurin për ndjesinë e ngopjes.
Fruktoza, në sasi të mëdha, konvertohet në yndyrë në mëlçi, duke kontribuar në probleme metabolike dhe në rezistencë ndaj insulinës.
Për më tepër, përbërës të tjerë të pijeve të ëmbëlsuara, si ngjyrat dhe aromat artificiale, mund ta dëmtojnë metabolizmin. Pijet si soda, pijet sportive dhe koktejet zakonisht janë të dëmshme për shëndetin dhe duhet të shmangen.
Nëse jeni të varur nga pijet e ëmbëlsuara, rekomandohet që gradualisht ta zvogëloni sasinë, duke i përzier me ujë të gazuar dhe pak lëng frutash, derisa të kaloni vetëm në ujë të gazuar. Shtimi i limonit ose limes mund të ndihmojë në përmirësimin e shijes. Ky është një hap i rëndësishëm drejt një stili jetese më të shëndetshëm. /Gazeta Shneta/