Shoqata Britanike mbi Dietën Ushqyese (BDA) ka publikuar së fundmi udhëzimet e reja për menaxhimin e kapsllëkut kronik, duke përfshirë 59 rekomandime të bazuara në ushqim dhe suplemente. Ndër ushqimet më efektive, kivi dhe buka e thekrës dolën të ishin veçanërisht të dobishme për përmirësimin e funksionit të zorrëve.
Kapsllëku kronik prek deri në 20% të të rriturve në Shtetet e Bashkuara dhe mund të shkaktojë shqetësim të vazhdueshëm, duke ndikuar negativisht në cilësinë e jetës. Studiues nga King’s College London, analizuan 75 prova klinike për të identifikuar ushqimet, pijet dhe suplementet që ofrojnë më shumë lehtësim, shkruan burimi Medical News Today transmeton Gazeta Shneta.
Sipas rezultateve, fruti i kivit, buka e thekrës dhe uji me përmbajtje të lartë mineralesh ishin opsionet më efektive.
Ndërkohë, probiotikët dhe suplementet me sena treguan përfitime të kufizuara. Këto gjetje u publikuan paralelisht në revistat “Journal of Human Nutrition Dietetics” dhe “Neurogastroenterology & Motility”.
Kapsllëku kronik mund të shkaktohet nga një dietë me pak fibra, mungesa e lëngjeve ose probleme të tjera shëndetësore. Simptomat përfshijnë lëvizje të rralla të zorrëve, vështirësi në jashtëqitje dhe nevojën për shtyrje të fortë. Nëse vazhdon kjo gjendje, mund të çojë në hemorroide, prolaps rektal apo bllokime fekale.
Për herë të parë, udhëzimet e BDA-së ofrojnë rekomandime të bazuara në prova shkencore, të vlefshme si për profesionistët e kujdesit shëndetësor, ashtu edhe për publikun e gjerë. Kjo ndihmon njerëzit të zgjedhin ushqimet dhe pijet më të përshtatshme për të përmirësuar funksionimin e zorrëve dhe për të parandaluar kapsllëkun kronik. /Gazeta Shneta/