Një metodë e pazakontë, por gjithnjë e më e përhapur, po tërheq vëmendjen e specialistëve të shëndetit mendor, përdorimi i karameleve të tharta për të ndalur një krizë paniku.
Sipas ekspertëve, shija e fortë dhe e menjëhershme që ato shkaktojnë mund të veprojë si një teknikë “grounding”, duke e rikthyer personin në ndërgjegjësimin e momentit të tanishëm, shkruan Utah State University Extension, transmeton Gazeta Shneta.
Ekspertët shpjegojnë se shija intensive zhvendos vëmendjen nga mendimet e shumta dhe të frikshme, duke e fokusuar trurin tek ndjesia fizike. Kjo ndërpret spiralen e ankthit dhe i mundëson individit të marrë frymë më thellë dhe të rifitojë kontroll.
Edhe veprimi i përtypjes dhe rritja e pështymës luajnë rol në aktivizimin e proceseve qetësuese të trupit.
Megjithatë, specialistët theksojnë se kjo nuk është trajtim i ankthit, por vetëm një mjet i thjeshtë që mund të ndihmojë në momentet kur ankthi bëhet i papërballueshëm.
Ata paralajmërojnë se personat që përjetojnë shpesh apo fort ankth duhet të kërkojnë ndihmë profesionale për vlerësim dhe trajtim afatgjatë.
Sipas Utah State University Extension, karamelet e tharta mund të funksionojnë si një strategji e shpejtë dhe praktike për të menaxhuar krizat e panikut, por ato nuk zëvendësojnë terapinë apo kujdesin e specializuar. /Gazeta Shneta/