Një analizë e re dhe madhore nga Organizata Botërore e Shëndetësisë (OBSH) dhe Agjencia Ndërkombëtare për Kërkimin mbi Kancerin (IARC) nxjerr në pah një fakt domethënës: deri në katër nga çdo dhjetë raste të reja kanceri në nivel global mund të parandalohen përmes zgjedhjeve të shëndetshme të stilit të jetesës dhe menaxhimit të kujdesshëm të shëndetit.
Studimi i publikuar në revistën “Nature Medicine”, në prag të Ditës Botërore të Kancerit 2026 (4 shkurt), analizon të dhëna nga 185 vende dhe përfshin 36 lloje kanceri, si kanceri i gjirit, mushkërive, zorrës së trashë, qafës së mitrës, stomakut, leukemisë dhe melanomës.
Sipas autorëve, rreth 37% e rasteve të reja të kancerit në vitin 2022 – afërsisht 7.1 milionë raste – lidhen me faktorë rreziku të parandalueshëm, shkruan burimi Medical News Today transmeton Gazeta Shneta.
Analiza identifikon 30 faktorë rreziku të modifikueshëm, përfshirë për herë të parë edhe nëntë lloje infeksionesh, duke theksuar rolin e vaksinimit, ushqyerjes së shëndetshme, shmangies së duhanit, alkoolit dhe ekspozimeve të dëmshme mjedisore.
Një tjetër gjetje e rëndësishme është se burrat preken ndjeshëm më shumë nga kanceret e parandalueshme sesa gratë.
Te gratë, barra më e lartë u vu re në Afrikën Subsahariane, ku rreth 38% e rasteve të reja lidhen me faktorë të modifikueshëm. Ndërkohë, te burrat, përqindja më e lartë u regjistrua në Azinë Lindore, ku mbi 57% e rasteve të kancerit ishin të parandalueshme.
Ekspertët theksojnë se studimi forcon nevojën për politika globale të forta parandaluese, veçanërisht në vendet me të ardhura të ulëta, ku barrën e kancerit të parandalueshëm e mbajnë në mënyrë disproporcionale komunitetet më të cenueshme. /Gazeta Shneta/