Komisioni Qendror i Zgjedhjeve ka numëruar afër 97 për qind të votave nga zgjedhjet e mbajtura dje për Kuvendin e Kosovës.
Lëvizja Vetëvendosje po prin e para me 25.69 për qind, ndërsa Lidhja Demokratike e Kosovës mbetet e dyta me 25.00 për qind, shkruan Gazeta Shneta.
Partia Demokratike e Kosovës është në veandin e tretë me 21.12 për qind dhe koalicioni AAK/PSD në pozitën e katërt me 11.59 për qind. Koalicioni NISMA/AKR/PD aktualisht gjenden nën pragun e 5 përqindëshit me 4.9.
Ndërkohë fituesi i këtyre zgjedhjeve Albin Kurti i është drejtuar sot qytetarëve me një mesazh falënderues. “Të gjithë ju që keni votuar për ndryshimin, e sidomos për VETËVENDOSJE!-n, u jam mirënjohës për vetëdijen e lartë dhe ndërgjegjen e thellë për ta shpëtuar republikën tonë nga zvetënimi i mëtutjeshëm”, ka shkruar Kurti.
Lexoni postimin e tij të plotë:
Mirëmëngjes të dashur qytetarë,
Prej mbrëmë ka shpresë. Sepse dje pati guxim. Ju votuat masivisht duke bërë që opozita e deridjeshme të korrë fitore bindëse. Ndryshimi ndodhi. Dhe, jo vetëm kaq. Populli vendosi që këtij ndryshimi i prin dhe do t’i prijë Lëvizja VETËVENDOSJE!.
Të gjithë ju që keni votuar dje u jam falenderues që keni kryer detyrën qytetare e obligimin demokratik në një kohë të vështirë siç është kjo që po kalojmë dhe në një vend të dashur siç është Kosova jonë.
Të gjithë ju që keni votuar për ndryshimin, e sidomos për VETËVENDOSJE!-n, u jam mirënjohës për vetëdijen e lartë dhe ndërgjegjen e thellë për ta shpëtuar republikën tonë nga zvetënimi i mëtutjeshëm.
Qytetarët folën me votën e tyre. Ata ndërhynë masivisht në skenën politike në mënyrë që drama kosovare e shtetit të kapur të mos ketë fund tragjik. Urtësia e popullit tonë në çastet vendimtare ishte asgjë më pak sesa fantastike.
Tash, ne duhet të punojmë. Ama sërish bashkë me qytetarët. Kurrë anash apo prapa qytetarëve. Bashkë, gjithnjë.
Punët e vështira që na presin vetëm sa ma shtojnë vullnetin. Ato nuk kanë llogari me neve, me juve, me mua.
Sepse: Erdhi dita!
Ju falemnderit të gjithëve dhe secilit.