Një studim i ri tregon se adoleshentët që ishin të ekspozuar ndaj niveleve të larta të PFAS-it para lindjes kishin më shumë gjasa të zhvillonin tension të lartë të gjakut.
PFAS-i (substanca per- dhe polifluoroalkile) janë kimikate që përdoren në produkte të zakonshme si ambalazhet ushqimore dhe tenxheret që nuk ngjisin. Ato quhen “kimikate të përjetshme” sepse nuk shpërbëhen lehtë dhe grumbullohen në mjedis dhe në trupin e njeriut, shkruan burimi Euronews Health transmeton Gazeta Shneta.
Kwto kimikate janë zbuluar në gjak, qumësht gjiri, spermë, mëlçi dhe tru, dhe janë lidhur me kolesterol të lartë, kancer dhe probleme me fertilitet.
Studimi i publikuar në “Journal of the American Heart Association”, analizoi të dhënat e mbi 1,000 fëmijëve në SHBA, duke përdorur mostrat e nënave të mbledhura pas lindjes dhe duke ndjekur shëndetin e fëmijëve deri në moshën 18-vjeçare.
Ekspozimi prenatal ndaj PFAS-it rezultoi i lidhur me rrezik më të lartë për tension të lartë gjatë adoleshencës. Rreziku ishte edhe më i madh te djemtë dhe fëmijët me ngjyrë të zezë.
Në disa raste, kimikate të caktuara u lidhën me ulje të tensionit në fëmijëri, por kjo ndikoi vetëm përkohësisht.
Studiuesit theksojnë se ndikimi i PFAS-it është i vështirë për t’u matur për shkak të mijëra varianteve të tyre dhe ndryshimeve të ekspozimit me kalimin e kohës.
Ata kërkojnë ndjekje afatgjatë të ndikimeve shëndetësore dhe rregullime më të forta për mbrojtjen e mjedisit dhe kufizimin e këtyre substancave në produkte dhe në ujin e pijshëm. /Gazeta Shneta/