Një studim i ri tregon se njerëzit që kanë më shumë besim te të tjerët dhe institucionet raportojnë nivele më të larta mirëqenieje.
Studimi, i publikuar në “Psychological Bulletin”, përfshiu të dhëna nga mbi 2.5 milionë persona në mbarë botën. Ky studim tregoi se njerëzit që priren të jenë më besues kanë gjasa më të mëdha të ndihen më të lumtur dhe më të kënaqur me jetën – gjë që lidhet edhe me jetëgjatësi dhe shëndet më të mirë, raporton Euronews Health transmeton Gazeta Shneta.
“Gjetjet tona tregojnë se besimi ka rol kyç në ndjesinë e lumturisë dhe kënaqësisë, sidomos te fëmijët, adoleshentët dhe të moshuarit”, tha Catrin Finkenauer, autore e studimit dhe profesoreshë në Universitetin e Utrechtit.
Studimi analizoi tre lloje besimi: besimin ndërpersonal (mes individëve), besimin në institucione si qeveria dhe bankat, dhe besimin shoqëror – besimi se shumica e njerëzve janë të ndershëm dhe të besueshëm.
Pavarësisht llojit, të gjithë ata që shfaqnin më shumë besim kishin mirëqenie më të lartë. Kjo lidhje ishte më e fortë te të rinjtë sesa te të rriturit në moshë mesatare.
Edhe pse nuk është e qartë nëse mirëqenia shkakton drejtpërdrejt përmirësim të shëndetit, ajo është lidhur me jetë më të gjatë dhe rrezik më të ulët nga sëmundjet e zemrës dhe kanceri.
Ndërkohë, mungesa e besimit mbetet një sfidë për grupet racore dhe etnike pakicë. Por ndërtimi i besimit mund të ndihmojë në ngushtimin e hendekut të mirëqenies mes grupeve të ndryshme shoqërore. /Gazeta Shneta/