Një studim i ri ka zbuluar praninë e substancave PFAS – të njohura si “kimikatet e përjetshme” – në të brendshme dhe peceta menstruale të ripërdorshme nga Amerika dhe Europa.
Studimi i publikuar në “Environmental Science and Technology Letters”, zbuloi përqendrime të larta të PFAS në 59 produkte higjienike të grave, sidomos në të brendshme menstruale dhe peceta të ripërdorshme. Në 30% të tyre, PFAS ishin shtuar qëllimisht për rezistencë ndaj ujit apo njollave, raporton Euronews Health transmeton Gazeta Shneta.
Sipas studiueses Marta Venier nga Universiteti i Indianës, nivelet e larta të fluorit tregojnë përdorim të qëllimshëm të PFAS, ndërsa nivelet e ulëta mund të vijnë nga ndotja aksidentale gjatë prodhimit. Por ka produkte pa PFAS, që dëshmon se ato nuk janë të domosdoshme për funksionalitetin.
PFAS janë të lidhura me dëme të shumta shëndetësore.
OBSH i ka klasifikuar disa prej tyre si kancerogjene, ndërsa hulumtimet i lidhin me probleme të fertilitetit, dëmtim të sistemit imunitar dhe zhvillim të vonuar të fëmijëve për shkak të ekspozimit në shtatzëni. Edhe pse lëkura ofron mbrojtje, kontakti i drejtpërdrejtë me zonat intime shton shqetësimet.
Produktet e ripërdorshme menstruale janë më të qëndrueshme për mjedisin, por kërkojnë më shumë studime për sigurinë ndaj PFAS – si për përdorim personal, ashtu edhe për ndikimin e tyre pas larjes./Gazeta Shneta/