Shkencëtarët kinezë, kanë njoftuar se kanë zhvilluar një test të ri të koronavirusit që është i saktë si një test laboratorik PCR, por që jep rezultate brenda katër minutave.
Testet e reaksionit zinxhir polimerazë (PCR), konsiderohen gjerësisht si më të saktat dhe më të ndjeshmet për virusin që shkakton COVID-19, por ato zakonisht zgjasin disa orë, shkruan MedicalxPress përcjell Gazeta Shneta.
Disa vende kanë përjetuar një ngadalësim të rëndë përballë kërkesës së madhe për testime, të nxitura nga përhapja shpërthyese e variantit shumë të transmetueshëm Omicron.
Studiuesit nga Universiteti Fudan në Shangai thonë se kanë një zgjidhje.
Në një artikull të rishikuar nga kolegët, të botuar të hënën në revistën ‘Nature Biomedical Engineering’, ekipi tha se sensori i tyre – i cili përdor mikroelektronikën për të analizuar materialin gjenetik nga tamponët – mund të zvogëlojë nevojën për teste laboratorike COVID që konsumojnë kohë.
“Ne implementuam një biosensor elektromekanik për zbulimin e SARS-CoV-2 në një pajisje prototip të integruar dhe portativ dhe treguam se ai zbuloi (ARN virusin) në më pak se katër minuta,”.
Studiuesit thanë se metoda e tyre ofron shpejtësi, lehtësi operimi, ndjeshmëri të lartë dhe transportueshmëri.
Prova e tyre përfshinte marrjen e mostrave nga 33 persona në Shangai që ishin të infektuar me koronavirus, me teste PCR të kryera paralelisht.
Rezultatet nga metoda e tyre ishin një përputhje “perfekte” me testet PCR, sipas artikullit.
Testet PCR jo vetëm që janë të ngadalta, por ato kërkojnë gjithashtu infrastrukturë laboratorike që mund të kufizohen në shumë vende, duke zvogëluar numrin e rasteve që mund të trajtohen çdo ditë.
Dhe ndërsa testet e shpejta diagnostikuese tani janë bërë të disponueshme në shumë pjesë të botës, ato në përgjithësi janë më pak të sakta.
Kina është një nga prodhuesit më të mëdhenj në botë të testeve të koronavirusit.
Sipas të dhënave të doganave, ajo eksportoi 1.6 miliardë dollarë komplete testimi në dhjetor, një rritje prej 144 për qind nga muaji i kaluar. /Gazeta Shneta/