Obeziteti është një faktor rreziku për shumë lloje kanceri, dhe numri i kancereve që më parë ishin atakuar zakonisht vetëm tek njerëzit mbi 50 vjeç, tani ka një prevalencë në rritje tek të rinjtë me obezitet.
Ndërhyrjet në dietë dhe stilin e jetës nuk janë gjithmonë të suksesshme në trajtimin e obezitetit dhe reduktimin e rrezikut të kancerit në afat të gjatë, dhe kirurgjia bariatrike (kirurgjia për humbjen e peshës) është treguar se zvogëlon shkallën e kancerit tek njerëzit me obezitet, shkruan Medical News Today përcjell Gazeta Shneta.
Tani, një ekip studiuesish nga Universiteti i Goteborgut në Suedi ka treguar se kirurgjia bariatrike mund të zvogëlojë rrezikun e kancerit të gjakut tek gratë, në një grup suedezësh.
Sipas Qendrës së Kontrollit dhe Parandalimit të Sëmundjeve (CDC), janë 13 lloje të kancerit që lidhen me obezitetin, dhe tani kërkimet sugjerojnë se kanceret e gjakut mund të shtohen në këtë listë.
Kanceret e lidhura me obezitetin përbëjnë 40% të kancereve të diagnostikuar në Shtetet e Bashkuara dhe gratë janë të prekura në mënyrë disproporcionale.
Nga 13 kanceret që lidhen me obezitetin, më i zakonshmi është kanceri i gjirit tek gratë në fazën pas menopauzës. Të tjera përfshijnë kancerin e mitrës dhe vezoreve, dhe ka disa prova që sugjerojnë se gratë me obezitet janë gjithashtu në rrezik më të lartë të kancerit të qafës së mitrës.
Dr. Magdalena Taube kohët e fundit drejtoi një ekip studiuesish nga Universiteti i Goteborgut në Suedi për të hetuar shkallën e kancerit të gjakut tek njerëzit që i ishin nënshtruar një operacioni bariatrik.
Rezultatet e studimit të tyre shfaqen në revistën “The Lancet”.
Dr. Taube i tha Medical News Today në një intervistë:
“Është sikur insulina [po] nxit kanceret e femrave, dhe meqenëse insulina dhe estrogjenet mund të rregullojnë ekspresionin e njëra-tjetres, […] ato mund të jenë të ndërthurura, duke i bërë gratë më të ndjeshme ndaj obezitetit, meqenëse gratë obeze janë në rrezik për nivele më të larta të insulinës.”
Për shkak të rritjes së rrezikut të kancerit me të cilin përballen njerëzit me obezitet, një përfitim afatgjatë shëndetësor i kirurgjisë bariatrike mund të jetë një rrezik më i ulët i kancerit. /Gazeta Shneta/