Kirurgu turk Metin Karadeniz është kapur duke mbajtur konsulta me pacientë, derisa nuk kishte marr licencë nga Ministria e Shëndetësisë. Nga Inspektorati Shëndetësor ende nuk kanë treguar masat që janë ndërmarr për këtë rast
Metin Karadeniz është një kirurg bariatrik nga Turqia i cili kryen operacione “gastric sleeve” ndryshe e njohur si zvogëlim i lukthit për heqje të peshës. Nga postimet në rrjetet sociale, shihet se Karadeniz ka kryer disa operacione të pacientëve shqiptarë në Turqi, shkruan Gazeta Shneta.
Karadeniz ka qëndruar në Prishtinë nga 12 deri më 14 janar ku ka mbajtur konsulta me ish-pacientë si dhe me pacientë të interesuar për t’u vizituar tek ai. Por kirurgut nuk i shkoi krejt puna siç e kishte planifikuar.
Gazeta Shneta më datën 13 janar ka marr informata se Karadeniz po i mbante konsultat me pacientë pa pasur licencë nga Ministria e Shëndetësisë. Për këtë çështje është njoftuar Inspektorati Shëndetësor të cilët kanë bërë inspektim më datën 14 ku kanë konstatuar se mjeku turk nuk ishte i licencuar, sikurse nuk ishte e licencuar edhe institucioni ku ai po mbante konsulta me pacientë “Pi Qendra Estetike”.
Kjo është konfirmuar edhe nga Ministria e Shëndetësisë përmes një përgjigje për Gazetën.
“Bazuar në raportin preliminar te inspektimit, emri i themeluesit të biznesit C.N. Medical Estetik – SH.P.K, (‘Qendres PI’), është Z. Sedat Akbaj. Në bazë të dhënave që posedon Divizioni i Licencimit të Institucioneve Private Shëndetësore, Institucioni me emër tregtar ‘PI QENDRA ESTETIKE’, nuk është i licencuar. Në bazë të dhënave që posedon Bordi për licencim të profesionistëve të huaj shëndetësor, ju njoftoj se nuk është pranuar kërkesë nga ‘PI QENDRA ESTETIKE’, për licencim të z. Karadeniz”, thuhet në përgjigjen e MSH-së.
Nga kjo ministri kanë deklaruar se janë në pritje të raportit të Inspektoratit Shëndetësor nga inspektimi dhe masat që janë ndërmarr.
Gazeta ka kërkuar sqarime nga “Pi Qendra Estetike” se pse nuk është licencuar nga MSH dhe nëse po dërgojnë pacientë për trajtim në Turqi, por të njëjtit nuk kanë kthyer përgjigje. /Gazeta Shneta/