Prokuroria Themelore në Prishtinë ka ngritur aktakuzë për tre zyrtarë të IT-së të QKUK-së, nën dyshimin për avullimin e mbi 104 mijë eurove në tenderin për sistemin e kamerave. E tenderin në këtë rast e kishte fituar kompania “NTSH Artech” me pronar Alban Bikliqi.
Njësia e Teknologjisë dhe Informacionit e QKUK-së në dhjetor të vitit 2019 kishte kërkuar 105 mijë euro nga drejtoria e përgjithshme dhe sektori i Shërbimeve të Përbashkëta, për furnizim dhe montim të sistemit të integruar të monitorimit me kamera dhe integrimin e sistemit të kontrollit dhe qasjes.
Njoftimi për kontratë ishte shpallur më 6 nëntor 2019, ndërsa kompania e biznesmenti Alban Bikliqi, “NTSH Artech” ishte shpallur fituese më 3 dhjetor me ofertën në vlerë 104,751 euro.
Kompani “Artech” mbante çmimin më të lartë krahas dy ofertues të tjerë të cilët ishin më të lirë. Grupi i operatorëve “Impact” “BM Group” “Cimi Electronic” kishin ofertuar me çmim 98,816 euro, si dhe “Besa Security” me çmim 100,746 euro.
Kontrata në mes QKUK dhe kompanisë “Artech” ishte nënshkruar më 9 shtator të vitit 2020, nëntë muaj me vonesë pas shpalljes së Njoftimit për Dhënie të Kontratës, ndonëse data e planifikuar ishte 13 dhjetori i vitit 2019.
Biznesmeni Bikliqi ia kishte zotuar mjetet Autoriteti Kontraktues – QKUK-së.
Kështu, QKUK në shtator të 2020 pagoi 104,751 euro për furnizim me kamera për objektet brenda këtij institucioni, si dhe dhomën e monitorimit të tyre.
Urdhërblerja ishte lëshuar më datën 29 shtator 2020, por malli ishte pranuar pesë ditë më herët.
Leutrim Jahja, Faton Hajzeraj dhe Ylber Krasniqi, kanë qenë tre anëtarët e Komisionit të Pranimit,të cilët kishin nënshkruar pranimin e mallit më 22 dhjetor 2020 dhe në bazë të këtij raporti QKUK kishte kryer pagesën. Por në fakt sipas auditorit malli nuk ekziston në QKUK.
Lidhur me këtë rastë Prokuroria Themelore në Prishtinë ka ngritur aktakuzë ndaj zyrtarëve të IT-së, Leutrim Jahja, Faton Hajzeraj dhe Ylber Krasniqi.
Që të tre këta zyrtarë t dyshohen për keqpërdorim të mbi 104 mijë eurove në Qendrën Klinike Universitare të Kosovës, lidhur me një tender për sistemin e kamerave.
Sipas aktakuzës, më 22.12.2020, të pandehurit, në cilësinë e personave zyrtarë (IT), në QKUK, në bashkëkryerje dhe në kundërshtim me Ligjin me Nr.04/L-042, për Prokurimin Publik, kanë shfrytëzuar detyrën zyrtare, me qëllim të përfitimit të kundërligjshëm të dobisë pasurore për veten apo tjetrin, duke mos i përmbushur detyrat e tyre zyrtare, në atë mënyrë që në aktivitetin e prokurimit “Furnizimi dhe montimi i Sistemit të integruar të monitorimit me kamera dhe Integrimi i sistemit të kontrollit të qasjes”, kontratë e nënshkruar në mes të QKUK dhe operatorit ekonomik “Artech”, tërë aktivitetin e kryer në dhjetor të vitit 2020, përfshirë pranimin e mallit, ekzekutimin e punimeve dhe pranimin teknik të punimeve, kanë nënshkruar një raport fiktiv e që ka qenë në kundërshtim me gjendjen faktike, kështu duke i shkaktuar dëm material në shumën prej 104,751.00 euro, QKUK-së
Jahja, Hajzeraj dhe Krasniqi muaj më parë janë përjashtuar përkohësisht nga puna në QKUK pas dyshimeve për keqpërdorime me tenderin për kamera./GazetaInsajderi/