Asnjë ndërhyrje kirurgjike nuk mund të bëhet nëse ka mungesë të penjve kirurgjik, por pavarësisht rëndësisë së tyre për trajtimin e pacientëve të cilët duhet të operohet klinikat dhe spitalet regjionale kanë mungesë të theksuar të këtyre penjve.
Për më tepër se një vit, Spitalit Regjional në Mitrovicë nuk është furnizuar me asnjë llojë të penjëve kirurgjik. Pacientët para se të hynë në sallë për operim duhet të sigurojnë penjt kirurgjik pasi që spitali ka mungesë të tyre.
Mungesën e penjve kirurgjik e konfirmon edhe vet drejtoresha e spitalit, Luljeta Buçinca Zhubi.
Ajo bënë të ditur se shpesh herë kanë marrë penj kirurgjik nga Qendra Klinike Universitare e Kosovës, ndërsa aktualisht nuk janë as të furnizuar mirëpo as nuk mund të marrin penj me huazim.
“Në Spitalin e Mitrovicës nuk ka asnjë llojë penjësh kirurgjik prej qe një vit. Më 22.04.2022 dhe 10.05.2022 jemi huazu nga QKUK dhe tash nuk kemi më penj dhe nuk kemi furnizime as huazime”, e konfirmon drejtoresha për Gazetën Shneta, ndërsa thekson se kërkesa për furnizim është bërë konformë planit vjetor por që deri më tani nuk janë furnizuar.
Gazeta ka arritur të siguroj një fotografi të listës së penjëve të cilët mungojnë në këtë spital.
Sipas burimeve të Gazetës Shneta, mungesë të penjve kirurgjik ka edhe në QKUK dhe pacientët janë duke u detyruar t’i blejnë vet penjt e nevojshëm – varësisht nga ndëryrja kirurgjike.
Mungesa e theksuar e penjve është edhe në Spitalin e Përgjithshëm të Pejës.
Sipas zëdhënësit për media, edhe në këtë spital ka mungesë të pothuajse të gjitha llojeve të penjëve kirurgjik ndërsa nuk ka treguar se tash e sa kohë kanë mungesë të penjve.
“Planifikimi për penj kirurgjikal është bërë me kohë dhe në sasin e nevojshme për nevojat e Spitalit të Përgjithshëm në Pejë, por furnizimet kanë qenë jo të rregullta dhe kemi mungesa pothuajse të gjitha llojeve”- thuhet në përgjigje e spitalit të Pejës.
Në Spitalin Regjional “Prim.Dr. Daut Mustafa” në Prizren furnizimi është më i qëndrueshëm në krahasim me spitalet tjera.
Sipas përgjigjes së spitalit, ka mungesë të penjëve poliglaktik (absorbues) numër 0, 1 dhe 2.
Në anën tjetër, Spitali i Përgjithshëm në Ferizaj nuk ka mungesë të penjëve kirurgjik. Sipas UD drejtorit të spitalit, Selajdin Sallahu, spitali qëndron mirë me furnizime sa i përketë penjëve kirurgjik.
“Me penjë kirurgjikal qëndrojmë mirë, nuk kemi mungesa”, tha Sallahu për Gazetën Shneta.
Gjatë ditës Gazeta ka adresuar pyetje në Barnatorën Qendrore në ShSKUK mirëpo të njejtët nuk janë përgjigjur deri në publikimin e këtij artikulli. Gjithashtu Gazeta ka dërguar pyetje edhe në Spitalin e Vushtrrisë, Gjilanit e Gjakovës por nuk janë përgjigjur.
Mos stabilizimi i furnizimeve me penjë kirurgjik në klinika e spitale rajonale është i theksuar tash e një kohë të gjatë, ndërsa nga Ministria e Shëndetësisë vazhdimisht thonë se furnizimi me barna dhe materiale medicinale është i qëndrueshëm. /Gazeta Shneta/
Spitali i Gjilanit në mungesë të penjve kirurgjik, pacientët detyrohen t’i blejnë