Pacientët të cilët kanë nevojë për intervenim kirurgjik në Spitalin Regjional të Gjilanit para se të hynë në sallën e operimimt duhet t’i sigurojnë penjt kirurgjik pasi që spitali nuk është furnizuar me asnjë llojë të këtyre penjve tash e tre muaj shkruan Gazeta Shneta.
Në listën e siguruar nga Gazeta Shneta, bëhet e ditur se në këtë spital, në të cilin marrin trajtim shëndetësorë qytetarët e Anamoravës e më gjerë mungojnë 29 lloje të penjve kirurgjik.
Drejtori spitalit, Arsim Emini, thotë se ka bërë kërkesë tek Shërbimi Spitalor Klinik Universitar i Kosovës për furnizim me penj, mirëpo sqaron se gjatë këtyre tre muajve të parë të këtij viti nuk janë furnizuar me asnjë llojë të penjve, të domosdoshëm për pacientët të cilët kryejn intervenime kirurgjike.
“Kemi mungesë të të gjitha llojeve të penjve. Nuk jemi furnizu nga janari i këtij viti, një kohë kemi shku në Spitalin e Ferizajt i kemi marrë, hua na kanë dhënë ata”, tregon ai për Gazetën Shneta.
Mos furnizimi me penj bie direkt mbi supet e pacientëve, të cilët duhet të bredhin nëpër barnatoret privat për t’i blerë këto penj apo çfarëdo materiali tjetër që mungon në spital.
Drejtori i spitalit, thotë se nga ShSKUK kanë marrë premtime që së shpejti do të bëhet një zhgjidhje për këtë, pasi që ai thotë se spitali nuk ka buxhet të mjaftueshëm për furnizim.
“Çdo herë kur kemi këto problem pacientët i blejnë vetë. Spitali nuk ka fonde të mjaftueshme për me i ble vet, buxheti është i mangët. Na kanë premtu që shumë shpejt kanë me bo një zgjidhje”, sqaron poashtu Emini.
Në anën tjetër, nga Shërbimi Farmaceutik në ShSKUK, njoftojnë se furnizimi me shumicën e penjve kirurgjik është duke u trajtuar tash e një kohë në Organin Shqyrtues të Prokurimit.
Organi Shqyrtues i Prokurimit tash e nëntë muaj është pa bord dhe si pasojë e kësaj të gjithë tenderët janë bllokuar.
“Furnizimi me shumicën e penjve kirurgjik është duke u trajtuar tash e një kohë të gjatë në OShP, si pasojë ka rezultuar që produkti të jetë në mungesë në njesitë e ShSKUK-së”, thuhet në përgjigjet e tyre dhënë për Gazetën Shneta.
ShSKUK poashtu thotë se furnizimi me barna nga lista esenciale si dhe materiale tjera shpenzuese është rritur deri në 70%.
Gazeta Shneta ditë më parë ka shkruar edhe për mungesën e fllaserave e materialeve tjera shpenzuese në Qendrën Kryesore të Mjekësisë Familjare në Komunën e Gjilanit./ Gazeta Shneta/