Kolesteroli i lartë dhe inflamacioni kronik dyshohet se rrisin rrezikun e zhvillimit të sëmundjes Alzheimer.
Një studim i fundit tregon se një proteinë e quajtur ABCA7 luan një rol funksional si një lidhje e mundshme biologjike midis kolesterolit dhe inflamacionit në sëmundjen e Alzheimerit. Punimi i ri u publikua më 25 gusht në revistën “Cells”.
Me hulumtimin e kryer në Qendrën e Alzheimerit në Universitetin Temple (ACT), nën udhëheqjen e Dr. Domenico Pratico dhe Dr. Nicholas Lyssenko, punimi raporton mbi efektet e uljes së kolesterolit dhe inflamacionit në ABCA7 – një transportues qelizor që rregullon mënyrën se si molekulat kalojnë nëpër membranat qelizore.
Gjetjet tregojnë akordimin dhe rregullimin e sofistikuar të niveleve ABCA7 gjatë inflamacionit dhe reduktimit të disponueshmërisë së kolesterolit.
Autorët sugjerojnë se heqja e lipideve të grumbulluara në qelizat nervore mund të jetë një veprim rutinë i ABCA7, i cili, nëse nuk kryhet, mund të çojë në neurodegjenerim.
Për më tepër, studimi sugjeron se humbja e ABCA7 në sëmundjen e Alzheimerit mund të ndodhë ose për shkak të një ndryshimi të papritur në kolesterol, ose për shkak të fillimit të inflamacionit në mikroglia dhe astrocite, të cilat janë qeliza mbështetëse të neuroneve.
Punimet e mëparshme treguan se nivelet e ABCA7 në tru bien me plakjen dhe mutacionet që shkaktojnë humbje të funksionit të tij raportohen te pacientët me sëmundjen Alzheimer.
Studimi aktual ofron të dhëna të reja mbi rolin e ABCA7 në sëmundjen e Alzheimerit, duke sugjeruar se mund të shfrytëzohet për zhvillimin e trajtimeve të reja. /Gazeta Shneta/