Kompania daneze farmaceutike Novo Nordisk ka njoftuar një partneritet të ri me OpenAI me synimin për të përdorur inteligjencën artificiale në të gjithë procesin e zhvillimit të barnave. Sipas kompanisë, ky bashkëpunim do të ndihmojë në sjelljen më të shpejtë të trajtimeve të reja dhe më të mira për pacientët në mbarë botën.
Marrëveshja synon të përdorë teknologjitë e avancuara të AI për të analizuar sasi të mëdha të dhënash, për të identifikuar kandidatë të rinj për barna dhe për të shkurtuar kohën mes kërkimit shkencor dhe përdorimit të trajtimeve nga pacientët, shkruan burimi Euronews Health transmeton Gazeta Shneta.
Kompania Novo Nordisk është e njohur globalisht për produktet e saj kundër diabetit dhe obezitetit, përfshirë barnat Ozempic dhe Wegovy. Drejtuesit e kompanisë theksuan se miliona njerëz jetojnë me diabet dhe mbipeshë dhe se ende ekzistojnë terapi të pazbuluara që mund të ndryshojnë jetën e tyre.
Përveç studimit shkencor, inteligjenca artificiale do të përdoret edhe për të rritur efikasitetin në prodhim, zinxhirin e furnizimit, shpërndarje dhe operacionet e brendshme të kompanisë. Pilot programet do të fillojnë në sektorët e kërkimit dhe zhvillimit, prodhimit dhe operacioneve tregtare, me synim integrimin e plotë deri në fund të vitit.
Edhe OpenAI e cilësoi këtë bashkëpunim si një hap të rëndësishëm për të ardhmen e kujdesit shëndetësor. Sipas drejtuesve të saj, AI po transformon industri të ndryshme dhe në shkencat e jetës mund të ndihmojë njerëzit të jetojnë më gjatë dhe më mirë.
Ky zhvillim tregon një trend në rritje ku kompanitë farmaceutike po investojnë fuqishëm në inteligjencën artificiale për zbulimin e barnave të reja. Konkurrenca në këtë fushë po shtohet, pasi edhe kompani të tjera të mëdha po lidhin partneritete të ngjashme për të shfrytëzuar potencialin e AI në mjekësi.
Bashkëpunimi mes Novo Nordisk dhe OpenAI mund të shënojë një epokë të re, ku inovacioni teknologjik dhe shkenca bashkohen për të sjellë trajtime më të shpejta dhe më efektive për pacientët. /Gazeta Shneta/