Agjencia Evropiane e Barnave (EMA), njoftoi se ka marrë një kërkesë nga Merck për të autorizuar barin antiviral të tyre kundër koronavirusit, pilulën e parë të treguar për trajtimin e COVID-19.
Në një deklaratë të martën, rregullatori i BE-së të barnave tha se kishte filluar vlerësimin e molnupiravir, të zhvilluar nga Merck dhe Ridgeback Biotherapeutics dhe se një vendim mund të merret brenda javësh nëse lejohet një miratim i tillë, shkruan MedicalxPress përcjell Gazeta Shneta.
Javën e kaluar, EMA lëshoi këshilla urgjente duke thënë se molnupiravir mund të përdoret për të trajtuar të rriturit e infektuar me koronavirus, të cilët nuk kanë nevojë ende për oksigjen shtesë dhe janë në rrezik të shtuar për të zhvilluar sëmundje të rënda.
Agjencia tha se bari duhet të jepet sa më shpejt që të jetë e mundur pasi COVID-19 të jetë diagnostikuar dhe brenda pesë ditëve nga fillimi i simptomave. Është menduar të merret dy herë në ditë për pesë ditë.
Në fillim të këtij muaji, Britania u bë vendi i parë në botë që miratoi barin molnupiravir.
Një pilulë antivirale që redukton simptomat dhe përshpejton shërimin mund të jetë novatore, duke lehtësuar ngarkesat e rasteve në spitale dhe duke ndihmuar në frenimin e shpërthimeve në lidhje me fushatat e vaksinimit.
Europa është tani në epiqendrën e pandemisë dhe Organizata Botërore e Shëndetësisë (OBSH), ka paralajmëruar se pa masa urgjente, Evropa mund të shohë 700,000 vdekje të tjera nga COVID-19 deri në pranverë. /Gazeta Shneta/