Një studim i ri paralajmëron se kompanitë amerikane të duhanit po shkelin rregullat e Instagramit, të cilat synojnë mbrojtjen e të rinjve nga përmbajtjet që promovojnë duhanin dhe nikotinën.
Sipas politikave të platformës, përmbajtjeje e industrisë duhet të jenë të kufizuara sipas moshës dhe të paarritshme për personat nën 21 vjeç. Megjithatë, studiuesit zbuluan se këto masa shpesh nuk zbatohen, shkruan burimi Health Day transmeton Gazeta Shneta.
Studimi i publikuar më 27 janar në revistën “Tobacco Control”, përdori një llogari fiktive në Instagram të regjistruar në emër të një përdoruesi nën moshën 21 vjeç.
Rezultatet treguan se përdoruesit e mitur kishin akses të pakufizuar në përmbajtje të lidhura me duhanin në 47% të rasteve, duke zbuluar boshllëqe serioze në sistemin e kontrollit të moshës.
Gjatë studimit u analizuan rreth 1,700 postime që lidhen me vapimin, pirjen e duhanit dhe qeskat me nikotinë nga gjashtë marka të njohura: “Vuse”, “Lost Mary”, “ZYN”, “Velo”, “Lucky Strike” dhe “Winston”.
Më shumë se 70% e postimeve përmbanin lidhje drejt faqeve komerciale të duhanit, ndërsa 42% e përmbajtjeve të publikuara nga influencerë ose personazhe të famshëm nuk deklaronin lidhje financiare me markat.
Vetëm 41% e postimeve kishin paralajmërim për moshën, ndërsa 73% përmbanin paralajmërime shëndetësore.
Studiuesit theksuan se disa marka, si “Lucky Strike” dhe “Lost Mary”, shfaqnin më shpesh mungesë të kufizimeve sipas moshës, çka është veçanërisht shqetësuese pasi “Lost Mary”, përdor elemente vizuale që mund të tërheqin të rinjtë.
Sipas ekspertëve të shëndetit publik, këto praktika ngrenë shqetësime serioze mbi rolin e rrjeteve sociale në mbrojtjen e përdoruesve të rinj dhe nevojën për zbatim më të fortë të rregullave ekzistuese. /Gazeta Shneta/