Qendra Stomatologjike Klinike Universitare e Kosovës më 11 nëntor 2021 pati hapur konkurs për pranimin e disa mjekeve specialistë të stomatologjisë në mesin e tyre edhe asistentë të stomatologjisë- infermierë në të cilën kishin të drejtë aplikimi edhe kandidatët me shkollim të infermierisë së përgjithshme, por kriteri i aplikimit ndryshoi në rihapjen e konkursit më 8 shkurt të këtij viti shkruan Gazeta Shneta.
Infermierët e përgjithshëm nuk kishin të drejtë të aplikonin më për pozitën asistentë të stomatologjisë.
Njëra nga aplikueset për këtë pozitë e cila deshi të mbes anonime tregoi për Gazetën Shneta se edhe pse dokumentet i kishte kompletuar ashtu siç kërkohej në kriterin e konkursit, u kthye mbrapa, për shkak se ajo ishte infermiere e përgjithshme dhe se ky kriter ishte ndryshuar.
Nga Qendra Klinike Stomatologjike e Kosovës në një sqarim për Gazetën thonë se tani kanë kuadro të mjaftueshëm të asistenteve dhe teknikeve të stomatologjisë “të cilët ofrojnë shërbime më kualitative dhe janë më të thirrur për shërbimin e këtij profesioni”.
“Sa i përket çështjes së mos pranimit të aplikacioneve për infermier të përgjithshëm, njësia e personelit është duke vepruar në pajtim të plot me kriteret e përcaktuar në konkurs përkatësisht sipas pikës – kualifikimi (shkollim) dhe dokumentet e kërkuar”, thuhet tutje në sqarimin e tyre duke mos dhënë detaje pse është larguar nga kriteri për aplikim me infermieri të përgjithshme.
Në anën tjetër, thuhet se më herët për shkak të mungesës së profileve të shkolluara janë pranuar dhe infermier të përgjithshëm, të cilët në shkollimin e tyre janë të trajnuar dhe përgatitur në mjekësi të përgjithshme.
Në lidhje më këtë Gazeta Shneta ka kërkuar sqarim edhe nga Shërbimi Spitali Klinik Universitar i Kosovës por të njejtët nuk janë përgjigjur. /Gazeta Shneta/