Disa konservues ushqimorë të përdorur gjerësisht në industrinë ushqimore mund të lidhen me rritje të rrezikut për diabet të tipit 2 dhe disa lloje kanceri, sipas dy studimeve të mëdha franceze të publikuara në revistat “BMJ” dhe “Nature Communications”.
Sipas gjetjeve, personat që konsumojnë sasi më të larta të disa aditivëve konservues kanë deri në 47% rrezik më të lartë për zhvillimin e diabetit të tipit 2 dhe deri në 32% rrezik më të lartë për disa forma kanceri, krahasuar me ata që i konsumojnë më rrallë, shkruan burimi Euronews Health transmeton Gazeta Shneta.
Konservuesit kimikë përdoren shpesh në mishra të përpunuar, fruta të thata, djathëra, produkte furre dhe çokollata.
Në analizën që lidhej me diabetin, studiuesit i ndanë konservuesit në dy kategori: jo-antioksidantë dhe antioksidantë.
Konsumi i lartë i konservuesve jo-antioksidantë u shoqërua me 49% rritje të rrezikut për diabet, ndërsa aditivët antioksidantë me 40% rritje.
Studimi mbi kancerin analizoi 17 konservues specifikë. Sorbati i kaliumit u lidh me rritje të rrezikut për kancer në përgjithësi dhe veçanërisht për kancer të gjirit.
Nitriti i natriumit, që përdoret shpesh në produkte si proshuta dhe sallami, u shoqërua me rrezik më të lartë për kancer të prostatës. Ndërkohë, nitrati i kaliumit dhe acetatët u lidhën gjithashtu me disa forma kanceri.
Hulumtimi u bazua në të dhënat e më shumë se 100,000 pjesëmarrësve të projektit “NutriNet-Santé”, të ndjekur për rreth 7.5 vjet.
Edhe pse studimet janë vëzhguese dhe nuk provojnë lidhje të drejtpërdrejtë shkak-pasojë, autorët kërkojnë rishikim të përdorimit të këtyre aditivëve dhe rekomandojnë konsum më të madh të ushqimeve të freskëta dhe më pak të përpunuara.
/Gazeta Shneta/