Faktorë si dieta e pasur me mish të përpunuar dhe e varfër me fibra, mbipesha dhe mungesa e aktivitetit fizik janë të lidhur me rrezikun e kancerit të zorrës së trashë. Një studim i fundit tregon se konsumimi i rregullt i sasive të mëdha të alkoolit gjatë jetës mund të rrisë gjithashtu këtë rrezik.
Studimi, botuar në revistën “Cancer”, shqyrtoi lidhjen midis konsumit jetësor të alkoolit dhe incidencës së kancerit të zorrës, shkruan burimi Medical News Today transmeton Gazeta Shneta.
Studiuesit përdorën të dhëna nga “Prostate, Lung, Colorectal, and Ovarian (PLCO) Cancer Screening Trial”, duke përfshirë informacione mbi stilin e jetës dhe dietën e pjesëmarrësve.
Pjesëmarrësit u klasifikuan si konsumues aktualë, të mëparshëm ose asnjëherë konsumues dhe u ndanë në katër kategori bazuar në mesataren e konsumit javor të alkoolit gjatë jetës: më pak se 1, 1 deri më pak se 7, 7 deri më pak se 14, dhe 14 ose më shumë pije në javë. Konsumi i shpeshtë në të gjithë jetën u klasifikua si i lehtë, i moderuar ose i rëndë.
Në studim përfshihen 88,092 pjesëmarrës për kancerin e zorrës dhe 12,327 për adenomat kolorektale (tumore jo kancerogjene, por që mund të shndërrohen në kancer).
Rezultatet treguan se personat që ndërprenë konsumimin e alkoolit kishin një rrezik më të ulët për adenomat jo të avancuara krahasuar me konsumuesit aktualë, duke sugjeruar një përfitim të mundshëm nga ndalimi i alkoolit.
Ky studim nënvizon rëndësinë e kufizimit të konsumit të alkoolit për parandalimin e kancerit të zorrës së trashë dhe potencialisht për shëndetin afatgjatë të zorrëve. /Gazeta Shneta/