Shëndeti i dobët mendor përbën një nga sfidat më të mëdha për shëndetin publik dhe ekonominë në Evropë, sipas një raporti të ri të Organizatës për Bashkëpunim dhe Zhvillim Ekonomik (OECD).
Sipas raportit, problemet e shëndetit mendor i kushtojnë ekonomive evropiane rreth 76 miliardë euro në vit, që përbën afërsisht 6% të buxheteve të shëndetësisë. Këto gjendje nuk ndikojnë vetëm individët, por kanë pasoja të gjera sociale dhe ekonomike, raporton Euronews Health transmeton Gazeta Shneta.
Një pjesë e madhe e kostove lidhet me faktin se sëmundjet mendore përkeqësojnë edhe gjendje të tjera fizike, duke kërkuar trajtime më të gjata dhe më të shtrenjta. OECD parashikon gjithashtu se këto probleme do të ulin rritjen ekonomike me rreth 1.7% të PBB-së në vit, nga 2025 deri në 2050, kryesisht për shkak të uljes së pjesëmarrjes në punë dhe produktivitetit.
Raporti thekson se depresioni, ankthi dhe çrregullimet nga përdorimi i alkoolit do të ulin jetëgjatësinë e shëndetshme me rreth 2.5 vite në Bashkimin Evropian gjatë 25 viteve të ardhshme, duke u lidhur me rreth 28,000 vdekje të parakohshme çdo vit.
Gjatë 20 viteve të fundit, rastet e çrregullimeve mendore janë rritur me rreth 21% në vendet e OECD-së. Aktualisht, më shumë se një në pesë persona preket nga probleme të shëndetit mendor, ku ankthi është më i shpeshti, i ndjekur nga depresioni dhe çrregullimet nga substancat.
Të rinjtë, gratë dhe personat me gjendje më të vështirë ekonomike janë më të prekurit. Një në katër persona të moshës 15 deri në 24 vjeç ka përjetuar një çrregullim mendor. Faktorë si pandemia COVID-19, luftërat, krizat ekonomike dhe shqetësimet për ndryshimet klimatike kanë ndikuar në përkeqësimin e situatës. Po ashtu, përdorimi problematik i rrjeteve sociale është një faktor në rritje.
Pavarësisht politikave ekzistuese, shumë njerëz nuk marrin trajtim. Rreth 67.5% e atyre që kanë nevojë për kujdes mendor në BE nuk kanë qasje në shërbime. Pengesat përfshijnë kosto të larta, mungesë shërbimesh në zona rurale dhe mungesë specialistësh.
OECD rekomandon kalimin drejt trajtimit në komunitet, përmes shkollave, kujdesit parësor dhe vendit të punës, duke theksuar se parandalimi i hershëm është më efektiv dhe më pak i kushtueshëm. /Gazeta Shneta/