Autoritetet kroate do të kufizojnë grumbullimet dhe do të zgjerojnë përdorimin e dokumentacionit rreth vaksinimit ose një testi negativ për COVID-19 për të frenuar infeksionet në rritje pasi numri i personave të infektuar shënoi rekorde të reja të premten.
Ekipi i krizës vendore, njoftoi se rregullat e reja për tubime do të zbatohen duke filluar nga sot, por masat me kartonin e vaksinimit dhe një test negativ për COVID do të marrë më shumë kohë për t’u zbatuar, shkruan MedicalxPress përcjell Gazeta Shneta.
Kryeministri Andrej Plenkoviç, u shpreh i zhgënjyer se vaksinimi po shkon “me ritmin e kërmillit” pasi ka arritur rreth 50% të popullsisë prej 4.2 milionë banorësh.
“Kjo nuk është normale,” tha Plenkoviç, sipas televizionit shtetëror HRT.
“Ne kemi pasur një pandemi për gati dy vjet, më shumë se 5 milionë njerëz kanë vdekur dhe kemi një situatë ku disa nga qytetarët tanë ende nuk e kuptojnë rrezikun që paraqet COVID-19”.
Ashtu si pjesa më e madhe e Evropës Qendrore dhe Lindore, Kroacia ka parë një rritje të madhe të infeksioneve dhe shtrimeve në spital në javët e fundit për shkak të shkallës së ulët të vaksinimit dhe rregullave të relaksuara të virusit.
Shumica e vendeve në rajon kanë shkallë vaksinimi prej rreth 50% ose më pak, që është më e ulët se mesatarja e Bashkimit Evropian prej rreth 75%.
Kroacia raportoi gati 7 mijë infeksione të reja të premten, pasi konfirmoi rreth 6,300 një ditë më parë. /Gazeta Shneta/