Kryeministri Albin Kurti ka hyrë në vetizolim prej ditës së sotme, pasi po dyshohet se është prekur nga koronavirusi.
Për këtë ka njoftuar vet kryeministri në një postim në Facebook, ku ka treguar se ka pasur kontakt me një zyrtar të Ministrisë së Integrimeve i cili poashtu ka pasur kontakt me një nga personat e konfirmuar pozitiv me Covid-19, transmeton Gazeta Shneta.
“Unë kam pasur kontakt me të, sikurse edhe punonjës të tjerë në MIE e ZKM, ndonëse gjithnjë duke respektuar rregullat për distancën fizike. Nga sot jam në vetizolim në banesë gjersa të dalin rezultatet e testimit për zyrtarin nga MIE”, ka shkruar Kurti.
Lexoni postimin e tij të plotë:
Të dashur qytetarë,
Sot është dita e parë kur nuk do të dal në punë në Kryeministri (ZKM). Një zyrtar i Ministrisë së Integrimeve Evropiane (MIE) ka pasur kontakt të ngushtë me një nga personat e dalur pozitiv në testin për COVID-19. Janë marrë mostrat dhe po presim rezultatin.
Unë kam pasur kontakt me të, sikurse edhe punonjës të tjerë në MIE e ZKM, ndonëse gjithnjë duke respektuar rregullat për distancën fizike. Nga sot jam në vetizolim në banesë gjersa të dalin rezultatet e testimit për zyrtarin nga MIE.
Do t’i kryejmë detyrat nga largësia me përkushtimin e njëjtë, do t’i marrim vendimet e duhura me përgjegjësinë e njëjtë.
Ju falemnderit.