Kryetari i Lëvizjes Vetëvendosje Albin Kurti dhe kandidatja për kryeministre nga LDK Vjosa Osmani, pritet të takohen sot për të filluar bisedimet për koalicionin qeverisës.
Fituesi i zgjedhjeve të 6 tetorit, Albin Kurti, ka deklaruar qysh ditën e parë se dëshiron ta bëj Qeverinë me Vjosa Osmanin dhe LDK-në. Gjatë fushatës zgjedhore ai pati thënë se nuk do të negocioj tri ministri, atë të drejtësisë, financave dhe punëve të brendshme, shkruan Gazeta Shneta.
Kurti do të takohet sot me Osmanin për të nisur bisedimet për koalicionin qeverisës, por ende nuk dihen kushtet e LDK-së.
Një burim i Gazetës brenda partisë së Isa Mustafës ka deklaruar se LDK është e interesuar që ta marr ministrinë e shëndetësisë dhe nëse ndodh një gjë e tillë atëherë do të mësohet edhe emri i ministrit.
“LDK është e interesuar për ministrinë e shëndetësisë dhe nëse pranon VV-ja atëherë ministër pritet të jetë Dr. Izet Sadiku. Edhe pse nuk ka qenë kandidat për deputet, ai e ka përkrahjen e kryetarit Mustafa pasi ka udhëhequr edhe grupin e ekspertëve të shëndetësisë”, ka deklaruar ky burim.
Sadiku ka qenë zëvendësministër i shëndetësisë gjatë mandatit të Imet Rrahmanit në Qeverinë e Isa Mustafës. Aktualisht ai është specialist në Klinikën e Infektivës në QKUK.
Sipas të njëjtit burim, për këtë pozitë është përmendur edhe emri i Dr. Ekrem Hysenit për shkak të ndikimit nga dega e Podujevës dhe nënkryetari Agim Veliu, ndërkaq ish-ministri Dr. Imet Rrahmani nuk është në listë për shkak të pakënaqësisë së kryetarit Mustafa me performancën e tij.
Kujtojmë se në listën e LDK-së ka pas mjek kandidatë për deputetë sikurse janë neurokirurgu Dr. Haxhi Avdyli, ish-drejtori i Onkologjisë Dr. Ekrem Hyseni, Dr. Hatim Baxhaku, etj. Mediat kanë raportuar se Hyseni ka fituar rreth 8 mijë vota, por një gjë e tillë ende nuk është konfirmuar pasi nuk janë publikuar ende rezultatet e kandidatëve nga KQZ. /Gazeta Shneta/