Dafina Gexha-Bunjaku pritet të jetë pasardhësja e ministrit të Shëndetësisë Arben Vitia, i cili do ta lë këtë pozitë për të kandiduar në zgjedhjet lokale për kryetar të Prishtinës.
Gexha-Bunjaku aktualisht mban pozitën e zëvendësministres ndërsa pritet të emërohet ushtruese e detyrës së ministres së Shëndetësisë pas dorëheqjes së Vitisë, shkruan Gazeta Shneta.
Më poshtë gjeni një biografi të saj e cila është e publikuar në uebfaqen e MSH-së:
Dafina Gexha Bunjaku ka lindur në Gjakovë. E diplomuar në Fakultetin e Mjekësisë në Universitetin e Prishtinës, ka vazhduar studimet post-diplomike në fushën e menaxhmentit shëndetësor – program i përbashkët i Universitetit të Prishtinës dhe Universitetit të Vjenës, Austri.
Është specialiste e epidemiologjisë, dhe ka punuar në Institutin Kombëtar të Shëndetësisë Publike në Departmentin e Epidemiologjisë. Gjithashtu ka qenë pjesë e ekipit të IKShPK për fazën përgatitore dhe menaxhuese për COVID-19.
Znj. Gexha-Bunjaku është koordinatore për Kosovën në ECDC (Qendra Evropiane për Parandalim dhe Kontroll të Sëmundjeve Ngjitëse), për raportim dhe bashkëpunim në disa fusha. Ka punuar në Programin e Mjekësisë Familjare të zhvilluar dhe përkrahur nga Organizata Botërore e Shëndetësisë dhe Kolegji Mbretëror i Mjekëve të Përgjithshëm, Mbretëria e Bashkuar.
Dafina Gexha Bunjaku është angazhuar si Zëvendësministre në Ministrinë e Shëndetësisë.