Gjykata Kushtetuese e ka shpallur të papranueshme kërkesën e kryetarit të Komunës së Prishtinës, Përparim Rama, me të cilën ka kërkuar vlerësimin e kushtetutshmërisë së Rregullores për ndryshimin dhe plotësimin e Rregullores për Menaxhimin e Mbeturinave.
Në atë kërkesë, Rama ka pretenduar se Rregullorja e kontestuar nuk është në përputhje me nenet 10 [Ekonomia], 119 [Parimet e Përgjithshme], 123 [Parimet e Përgjithshme] dhe 124 [Organizimi dhe Funksionimi i Vetëqeverisjes Lokale] të Kushtetutës së Republikës së Kosovës dhe nenet 81 (Shqyrtimi i detyrueshëm i ligjshmërisë) dhe 82 (Procedura për shqyrtimin e ligjshmërisë) të Ligjit nr. 03/L-040 për Vetëqeverisjen Lokale, raporton “Betimi për Drejtësi“.
Më 13 shtator 2024, Kuvendi i Komunës së Prishtinë përmes vendimit shfuqizoi paragrafin 3 të nenit 16 të Rregullores për Menaxhimin e Mbeturinave dhe obligoi kryetarin e Komunës së Prishtinës dhe Drejtorinë e Shërbimeve Publike të Komunës së Prishtinës për zbatimin e vendimit në fjalë.
Kurse, më 27 shtator 2024, Ministria e Administrimit të Pushtetit Lokal (MAPL) përmes vendimit vlerësoi se vendimi për ndryshimin dhe plotësimin e Rregullores për Menaxhimin e Mbeturinave ishte në kundërshtim me legjislacionin në fuqi.
Më 5 dhjetor 2024, Kuvendi i Komunës në mbledhjen e jashtëzakonshme miratoi Rregulloren e kontestuar dhe shfuqizoi vendimin e 18 shtatorit 2024 lidhur me shfuqizimin e paragrafit 3 të nenit 16 të Rregullores. Një ditë më pas, ia dërgoi MAPL-së listën e akteve të miratuara.
Në vendim thuhet se më 13 dhjetor 2024, Sektori Ligjor i Komunës së Prishtinës iu drejtua MAPL-së përmes komunikimit elektronik, lidhur me mbledhjen e jashtëzakonshme të 5 dhjetorit 2024, duke e noftuar që konsideron se procesi i hartimit të aktit nënligjor të miratuar në seancën e 5 dhjetorit 2024 ishte bërë në kundërshtim me dispozitat ligjore që rregullojnë procesin e hartimit dhe mbajtjes së konsultimit publik të akteve nënligjore të Komunës.
Kurse, MMPHI-ja kishte vlerësuar se Rregullorja e kontestuar është në përputhshmëri me Ligjin.
Rama ka pretenduar se inicimi për ndryshimin dhe plotësimin e Rregullores së kontestuar nuk është bërë nga organet e autorizuara sipas Udhëzimit Administrativ për Administratë të hapur në Komunë. Po ashtu, pretendoi se miratimi i Rregullores së kontestuar ka rezultuar në shkelje të UA.
Sipas Kushtetueses, në kontekst të paragrafit 4 të nenit 113 të Kushtetutës, Rregullorja e kontestuar nuk përbën as “ligj” të Kuvendit të Kosovës dhe as “akt të Qeverisë”, por është një akt nënligjor i miratuar nga Kuvendi i Komunës. Prandaj, duke marrë për bazë atë që akti i kontestuar nuk përmbush kriterin e parë të pranueshmërisë, pasi nuk është as ligj as akt i miratuar nga “Qeveria”, Gjykata nuk do të vazhdojë me vlerësimin e asaj nëse Rregullorja e kontestuar e miratuar nga Kuvendi Komunal mund të ketë cenuar përgjegjësitë komunale ose zvogëluar të hyrat e saj, siç është përcaktuar në paragrafin 4 të nenit 113 të Kushtetutës.
“Thënë këtë, Gjykata rikujton që Rregullorja e kontestuar ishte objekt i vlerësimit të përputhshmërisë së saj me Ligjin për Mbeturinat nga MMPHI, megjithatë, parashtruesi i kërkesës, përkundër asaj që, ndër të tjera, konteston edhe procedurën e miratimit të Rregullores së kontestuar, në kërkesën e tij ka specifikuar se konteston Rregulloren e kontestuar, si akt nënligjor i miratuar nga Kuvendi Komunal, duke kërkuar edhe shpalljen e pavlefshme të saj”, thuhet në vendim.
Gjykata vë në dukje se ndaj Rregullores së kontestuar, si akt normativ administrativ i nxjerrë nga Kuvendi i Komunës, Rama mund të paraqes padi dhe se Gjykata Supreme është kompetente për gjykimin në shkallë të parë lidhur me padinë për shfuqizimin e një akti nënligjor.
Rrjedhimisht, Gjykata Kushtetuese e deklaroi kërkesën e papranueshme.
Ndryshe, Gjykata Supreme e kishte refuzuar si të pathemeltë kërkesëpadinë e Komunës së Prishtinës për caktimin e masës së përkohshme të sigurisë kundër të paditurave- Ministria e Administrimit dhe Pushtetit Lokal, dhe Ministria e Mjedisit, Planifikimit Hapësinor dhe Infrastrukturës, me të cilën është kërkuar të shpallet e paligjshme Rregullorjra për plotësim/ndryshimin e Rregullores për menaxhmin e mbeturinave.
Komuna e Prishtinës kishte kërkuar që të ndalohet prodhimi i efekteve juridike të Rregullores në fjalë, e nxjerrë nga Kuvendi i Kryeqytetit në mbledhjen e 5 dhjetorit 2024.