Një studim i ri sugjeron se aktiviteti fizik i kryer në mëngjes mund të përmirësojë funksionin e zemrës dhe mushkërive, sidomos te të moshuarit.
Sipas kërkuesve, të ushtruarit herët dhe në mënyrë të rregullt lidhet me formë më të mirë fizike dhe efikasitet më të madh në ecje, shkruan burimi Health përcjell Gazeta Shneta.
Studimi i publikuar në “Medicine & Science in Sports & Exercise”, përfshiu 799 të moshuar me moshë mesatare 76 vjeç. Ata mbanin pajisje që matnin aktivitetin ditor dhe iu nënshtruan testimeve të funksionit kardiopulmonar.
Zbulimet treguan se ata që ishin më aktivë në mëngjes kishin kapacitete më të larta fizike dhe përdornin energjinë më mirë gjatë ecjes. Po ashtu, ata që ruanin orare të qëndrueshme aktiviteti kishin përfitime të dukshme për shëndetin.
Ekspertët besojnë se kjo lidhet me ritmin cirkadian – ora e brendshme biologjike që ndikon në funksionet trupore. Ushtrimet në mëngjes mund të ndikojnë pozitivisht në funksionin e muskujve dhe në përmirësimin e performancës.
Edhe pse studimi nuk provon se ushtrimet në mëngjes shkaktojnë drejtpërdrejt përmirësim të shëndetit të zemrës e mushkërive, ai përputhet me kërkime të tjera që e lidhin aktivitetin fizik të hershëm me rrezik më të ulët për sëmundje kardiovaskulare, sidomos te gratë.
Megjithatë, koha më e mirë për të ushtruar mund të ndryshojë sipas kronotipit personal dhe objektivave shëndetësore. /Gazeta Shneta/