Instituti Kombëtar i Shëndetësisë Publike ka filluar përgatitjet për të siguruar testet diagnostifikuese të infeksionit të Lisë së Majmunëve.
Zëvendësministrja e Ministrisë së Shëndetësisë, Dafina Gexha, gjatë një konferencë për media ka thënë se së shpejti do të mbahet një takim në mesë të Institucioneve Shëndetësore dhe Ministrisë së Shëndetësisë për të diskutuar më hollësisht në lidhje me këtë infeksion i cili tashmë është shpërndarë në disa vende të botës.
Gexha thotë se Lija e Majmunëve nuk ka shpërndarje të shpejtë sikurse COVID-19, dhe një gjë të tillë ajo e cilëson lajm të mirë.
“Kanë filluar përgatitjet për testet diagnostifikuese për këtë sëmundje në ndërkohë do të mbajmë së shpejti një takim me institucionet shëndetësore për të diskutuar për hollësitë. Njëkohësisht Ministria e Shëndetësisë dhe Instituti Kombëtar i Shëndetësisë Publike është në kontakt me qendrën Evropiane për Parandalim të Sëmundjeve Ngjitëse dhe Organizatës Botërore të Shëndetësisë. Jemi duke punuar me të gjitha nivelet e organeve shëndetesore e veçmas me organet e shëndetit publik që të shpërndajmë këshilla të sakta për parandalimin diagnostifikimin dhe trajtimin e sëmundjes”, tregon Gexha.
Zëvendësministrja poashtu theksoi se janë duke i studiuar masat që po ndërmerren nga shtetet tjera të cilat tashmë kanë raste të Lisë së Majmunëve.
Sipas IKShPK-së në Kosovë asnjëherë nuk ka pasur raste me Lijë të Majmunëve.
Drejtori i Institutit Kombëtar të Shëndetësisë Publike, Naser Ramadani, theksoi se ekipet e epidemiologëve janë në gatishmëri të plotë për të përcjellë gjendjen në vend.
“IKShPK ka përpiluar dokumentin e parë, me rekomandime dhe masa për institucionet shëndetësore sa i përket sëmundjes së lisë së majmunëve, i cili është shpërndarë të gjitha institucioneve shëndetësore në vend, dhe do të përditësohet me të dhënat e reja”, tregoi ai.
Lija e majmunit është një virus që shkakton simptoma të etheve, si dhe shfaq gunga në trup.
Përhapja e infeksionit bëhet përmesë kontaktit të ngushte, me kafshë apo me njeriun e infektuar nga infeksioni.
Një infeksion i tillë për herë të parë ështe gjetur tek majmunët në vitin 1958, dhe u emrua “Lija e Majmunëve”. /Gazeta Shneta/